CHAPITRE LXXXIIL

Comment le roy arriva à Tournay à mistère couvert durant ceste journée.

À cecy s'accorde beaucop la venue du roy par dechà ; le quel, comme se la chose eust esté forgiée et practiquée toute à pourpos, s'en venist devers Tournay pour estre aux ascoutes de ceste journée qui se feroit à Bruges, afin que se aulcune rumeur feust sourse entre le père et le fils, et de quoy fait ensieuvist à l'encontre de ceulx de Croy ou aultrement , il peust venir à garant d'iceulx, et prendre partie à l'encontre du comte, et par ce moyen avoir entrée et commenchement pour le desfaire. Et combien que la chose ne m'est pas clère pour affirmer que ainsi feust, toutesvoies le comte n’y entendoit riens moins, nin'en firent cent mille aultres qui ainsi l’entendoient; car souvent et dru, et eux ou aulcuns de leurs privés estoient devers luy partout où il estoit, à Arras et à Tournay, et tenoient en main le roy et le duc d'ung lez et d'aultre à leur souhait ; et le comte, comme

habandonné de tous les deux, n’avoit refuge qu’au peuple de son père , là où je le laisse venuen Gand, haultement receu, et coppe la matère sur ly pour venir à Bruges où estoit le père en attente de sa journée.