GEORGE CHASTELLAIN

cour du parlement ; avecques pluiseurs autres choses , dont le duc et ses barons faisoient danger et contradiction. Dont, pour ce que le roy le voyoit restif contre ly et mal ploiant à ses desirs, et que voix couroit aussy, et lui avoit-on donné à entendre, qu'il s'estoit allié et ajoinct avecques le comte de Charolois , le roy de l’ung et de l'autre dévola parfois aucuns languages, et de quoi le duc de Bretagne averti de sa part se tenoit à préavisé de manasce; car lui fut dit , audict duc , que le roy devoit avoir d'ct : que deux ou trois les plus grands de France ji mettroit au dessoubs et en servage, et deust-il prendre les Anglois meismes à sa part pour les destruire. De laquelle chose le duc de Bretagne averti, et que meismes les Anglois l'en avoient averti par leurs lettres, disans que le roy meismes avoit usé de tels langages à eulx , sainement pensa de y pourveoir par le ploy contraire. Et délibéra d’envoier meismes en Angleterre ; non pas que je die que ce il feist à intention de faire alliance contre le roy avecques les Anglois, mès au moins pour mettre barre et traverse que les Anglois ne servissent le roy pour le desfaire. Et pour sçavoir aussi comment il alloit de la vérité de ce qu'on lui avoit donné à entendre, que le roy avoit usé de tels langages et devises avecques les Anglois. Et de fait, comme il fut cogneu clèrement depuis, le duc de Bretagne fit monter en mer ung sien vice-chancelier, nommé maistre Pierre de Roville ; et celui , afin que la chose en demorast cellée , fist-on abillier en habit de Jacopin; et ainsi arriva au port. Mès comme toutes choses viennent à congnoissance tost ou tard, le roy en fut averti temprement. De la souppechon qu'il y prenoit avecque dangier encore plus que devant, sen anima sur ledict duc, et désiroit bien à venir au remède s’il eust pu par sens. Dont, comment il en fist, ne par quelle manière, se dira cy-après; car estrange en sera la narracion qui s'en fera, et l'eflect du grand danger pour la consé-

quence.