CHAPITRE XL

Comment, après que avoit veu que la journée des Anglois tournoit à petit effect, le roy pria au duc le surattendre à Hesdin.

Or avoit le roy Loys de France besongnié, ce lui sambloit, avecques son bel oncle, ce que faire y pooit pour celle saison ; car estoit la journée des Anglois venue à petit effect, qui avoit esté la cause de le faire venir à Hesdin, et de le faire vuidier hors de son pays de Flandres, où gisoit tout son affaire.

Dont, pour ce que la journée de convencion-

arrière estoit remise au premier d'octobre, pria audict son bel oncle que là voulsist surattendre encore jusques audict jour , afin de venir à chief et à fin des promesses entreparlées à deux lez, c'estoit de paix ou de longues trèves; et puis ce fait ou failli, disoit le roy, le duc s'en retourneroit là où il voudroit, à son plaisir; et pendant ce temps, ly meismes le roy aussy demorroit là entour, et ne s'en bougeroit de gaires loing jusques audict jour venu, comme son intencion estoit. Mès en peu de jours après, novelles lui vindrent que Anglais vaucroient par mer; et craignoit-on que ne voulsissent descendre en Normandie. Si alla à Rouen; et là venu et sejorné peu de jours, se alla logier à Mauny, à cinq lieues de là, en la maison de messire Pierre de Brezé, comte de Mallevrier ; et y fut par l’espasce d'ung mois ; et la royne estoit demorée à Neufchastel, dechà Rouen, en signifiance du retour que voloit faire en Artois sur l’approchement de la journée. Or disoient gens, que deux choses movoient le roy forment d'entretenir ce duc cy en Hesdin près de ly : la première et principale si estoit, pour l'amour des Anglois, aveucques lesquels il voloit avoir seurté et amour s'il pooit : mès sçavoit bien que , sans le moyen de son bel oncle, n'y parvendroit ee si à grand dur non; car sur ly et en y pendoit tout, comme seul qui le roy Eduard avoit fait roy et mis ec sou tronne. Si n'estudioit maintenant qu’en le tenir encore près de ly, par belles pareles et amusemens jusques audici jour, et ne craignoit riens que son

eslonge. La seconde cause se disoïit en couvert, mès je n'afferme pas que ainsi feust :

et disoit-on que le roy devoit avoir sceu, par calculation des étoiles là haut , ce en quoi ii mettoit fort son attente de tout temps, que le duc son bel oncle devroit avoir ung dur et périlleux accident dedens le mois de septembre, par quoi, se mort en ensievoit d'aventure, ce lui porroit tourner à grand joie et profit quand 1l s'en trouveroit près; car disoient ceulx qui cecy mettoient avant : que son intention estoit , se ainsy avenoit, de saisir le chasteau de Hesdin avecques ce qu'il y trouveroit, avant que le comte de Charoleis y venist, et autres terres et places , tousjours en désavantage dudict comte, lequel il héoit à felle ; et eust eu deux ou trois millions d’or vaillant que le duc avoit apportés là, qu'en argent, quen meubles. Et par ainsy, par la haine que avoit audict comte, partie aussy par la cremeur que avoit de ly, s'il venoit à règne et à terre, poroit-on colorer cest article , et que le roy y pooit avoir pensé ; mès pour l'onneur de sa magesté , ne le voudroie affermer pour vrai, si non pour parolle volant.