CHAPITRE LIl

Comment plusieurs estranges languages et murmarces couroient entre toutes gens, à cause des rigueurs du roy.

Merveilles estoit, toute celle nuict et le jour après, d'oyr les murmures et les estranges languages qui coroient entre toutes gens nobles et non nobles, clercs et gens de conseil, à cause des rigueurs et estroits ter

mes que cestes gens ambassadeurs du roy avoient tenus, par espécial en chargeant l'honneur du comte de Charolois et de lui dire injures intolérables ; et de quoi on sçavoit bien qu'en lui n’avoit les coulpes ne le corage tel. Si en avoit assez qui disoient ; que véritablement les ambassadeurs pooient bien parler baudement et sans resoing ; car avoient emprès eux , et en la maison du duc, ceux qui les introduisoient à dire ainsi, et mesmes avoient fait et envoyé par-delà devers le roy les instructions telles comme ils les voloient avoir faites et dites, et quasi esleu et nommé les personnes aigres et tout propres à ce faire, pour plus tost venir à leurs fins; car ne béoient sur toute aultre riens du monde, que de tirer dehors de prison le bastard, sur qui et en qui pendoit toute leur ruyne, et lequel, ce sçavoient bien, les pooit accuser et faire congnoistre en leur maulvaisté et couverte imagination de long temps, et parquoi ils seroient rattains. Si ne visoient que à l'avoir dehors par quelque bout que ce fust, ou par manasse du roy ou aultrement ; car par leur vertu ne propre sens n'y véoient tour, si non par ceste voie. Et cuidoient en leur aveuglement que les aultres tant mains, qui cler véoient et dissimuloient, ne véissent goutte ne ne perceussent de leur bourde; laquelle toutevoies voloit si espandue par rues , Si grosse et si matérielle, que toutes bouces y mordoient. Et disoit-on que la justification que le roy avoit fait faire de 1y, touchant le bastard, lui estoit plus accusation que parement, comme en effect à moi mesmes il me sambla, qui l'oys; et dis à par moi : que d'une chose si mal emprise et si pleine de souppechon comme iceste , ne séoit point à un roy de France de soi voloir parer par tele manière, veu que d’aultres en avoit assez, et lesquels lui eussent esté de plus de fruit; car d'une chose mal emprinse et mal encommenciée, on n'a bonne fin par continuer en mesmes; mès comme souvent on se desvoie par abus de sens, par retour à cely, on se recveuvre

GEORGE CHASTELLAIN