CHAPITRE LXIX
Comment les médiateurs reprindrent le seigneur de Croy de sa desfiance touchant les promesses du comic.
A ceci fust respondu brief et bien assis :
« Monseigneur de Croy, à vous oyr parler, mès pardonnez-nous , vous tenez peu de bien de monseigneur de Charolois, et trop peu, quand vous mettez telle et si grant desfiance en sa promesse et en ses lettres et scellés, tels qu'il vous a offerts; car ne croions point, et sçavons véritablement , que pour tout l'or du monde il les daignast rompre. Et feusssiez ores le plus mesfait envers ly qui oncques fust au monde, et voust eust donné rémission et mercy, receu en grace et clémence, tant seulement par paroles et en mot de prince, si ne voudroit-il jamès frustrer ne rappeler sa bonté donnée. Or regardez doncques comment il se poroit ne voudroit consentir à rompre ne à fausser son scellé, ne à luy faire celle honte, qui est si hault et si noble prince, que de commuer sa grasce promise, escrite et scellée et signée de sa main, en austérité et perverse malice, par souvenir de commis delict. O non, plaise à Dieu! mieulx lui voudroit non avoir esté né. Et nous samble que trop malement vous errez ici et en mettez le malvais bout devers vous. Et quant au point que vous dites que vous vous estes traveillé à acquérir sa grasce : s’il convient parler à vous et respondre à l’appartenir du cas, en cela faisant vous n'avez fait que ce que devez, et ce à quoi vous estes tenu par toulte obligation d'onneur et de droit, comme qui estes fait en la maison tel que vous estes , et emprès le père, dont le fils vous doit bien estre recogneu. Se vous dites que vous estes offert à ly, et que vous avez quis sa grasce non obtenue, se vous disons bien : que voirement nous luy avons oy dire que aultrefois vous en a veu faire le samblant et tenir manières faintes, mès oncques ne vous trouva poursievant vostre promettre, ne donnant vertu à vos parolles; mès continuiez et perseveriez toujours en vostre viel train, sans que oncques en tournast cognoissance devers
CHRONIQUE DES DUCS DE BOURGOGNE.—III: PART
ly d'aucune amende. Et quant à ce que vous pesez, d'abandonner le roy qui vous à appelé à estre à ly, et que à regret vous le poriez et devriez faire, et que aujourd'uy il vous est et sera escu de protection et de garant encontre vos haineux, monseigneur de Croy, vous , sain d'entendement et de vive rayson, ne seroit besoing à vous , tel homme que vous estes et à tel maistre, quérir nulle protection de dehors, quand vous vous tenriez en la grasce de ceulx dont vous vous estes porté non grevé de nulluy jusques icy. Et se d'aventure . le mesfait y estoit et par quoi vous vous doutassiez de la vengeance pour le temps avenir, n'en seroit point la mercy et le pardon plus propre et mieulx séant, humblement requis en cely qui seroit offensé, que par fièrement et descognoissamment maintenir pointe et quérir sauveté ailleurs, là où fuite est deshonorable ? Vous cognoissez le roy et sçavez quel homme il est; il n'aime point monseigneur de Charolois , et se ferme en rigueur contre 1y; et vous, pour ce que monseigneur de Charolois ne vous a point en grasce , ce luy samble ,il vous a attrait à luy, et vous porte samblant d'amour pour ce que l'aultre vous het, et pour ses secrètes fins. Et vous, vous faites semblant d'amer et honorer celui qui het ce que vous devez amer et honorer devant tous, et qui est aussi puissant de voüs maintenir et faire demorer tel que vous estes, comme vous estes devenu et fait, au lieu de vostre nourriture , tel que vous estes. Et quant à ce que vous mettez desfiance en sa grace , et qu'il vous samble que la mesveillance y peut estre enracinée tellement qu'elle n’en pora vuidier, sinon à grand doute, pour quoy doncques, et puisque vous avez celle cognoissance, ne mettez-vous dehors de vous les causes qui vous samblent estre fondement de ceste mesveillance , et vous mettez en vostre pure netteté devers ly, par quoy il puisse cognoistre son tort devers vous, et relinquir son ire.
Mettez-vous en ce devoir ; et puis après dolezvous ou loez-vous de ly ; se la cause de l'indignation y est et que vous la sentez, ostez : la dehors de vous et lui donnez une obligation d'onneur envers vous par satisfaire. En mettant le droit devers vous, vous mettrez “le tort devers ly; et par vostre humilité qui vous
sera honorable, vous vaincrez son fier animé corage, qui est maintenant de dure attente. »
