CHAPITRE CEX

Comment l'escoutète prit à l’heure de mye-nuit ledit prisonnier hors de la porte , et le mist en la prison de ville.

A dur regret et à anuy de cuer, l'escoutète de Bruges, celle mesme nuit, à douze heures, vint à la porte quérir le bastard, couchié en son lit et non en attente de si prochaine mort. Si l'en emmena en la prison de la ville, et lui dist qu'il avisast ct pensast à son ame , car le duc l'avoit jugié à mort, et n'y avoit nul remède. Si commença à plorer et à soi lamenter durement de sa triste fortune le bastard ; et n'eust jamès cuidié . en si jeusnes jours , et à telle parenté qu'il avoit, venir à si dure fin, pour cas encore rémissible, et dont le roy et tous aultres princes baillent rémission tous Jes jours de samblables. Or en estoient tous avertis soudainement ; et meismes l'escoutète, qui quéroit l’eslongement de ceste mort, en avoit secrètement avert les amis, afin de venir encore à aulcun remède,

qui porait, par aulcunes grandes voies. Si allèrent les parens devers la ducesse , la mère, prier pour son aide et pour son intercession envers le duc, pour sauver ce jeusne fils. Et combien que l’escoutète avoit ordonnance expresse de le faire morir à onze heures du matin, encore sursist le temps et s'enhardia de le différer jusques à trois heures après midi, par espoir qu’en ce pendant , le duc poroit remitiguer sa rigueur , par l'intercession de sa mère et d'ung évesque d'Angleterre qui s'y employa tout.

Si aviat que messire Jacques de Hercies, chevalier et diligent poursieveur de ceste matère, vint ferrant battant à l'Escluse, trouva que le duc é’estoit allé esbanoyer , celle mattinée, sur le port, en petits bottequins, vaucrant et nageant Ça et là , et ne se pooit trouver et attaindre par nul sens; par quoy le temps coula et monta tousjours à haulte none ; et trouva sa peine perdue etsa diligence faite en vain : Car avant que pooir venir à ly pour faire la prière de sa mère , jà estoit le temps venu jusques à l'eure qui estoit limitée pour sa mort , parquoy toute peine , ce savoit bien, estoit cassée et frustrée et de nul proufit.

Dient aulcuns toutes-fois, que le duc commua son Courage , à la supplicacion de sa mère, mès.ce fust trop tard ; mès je n'afferme poinct qu'ensi en fust ; et s’il le fist, si le fist-il pour ung contentement dont il savoit bien que l'effect-n'en sievroit poinct.