CHAPITRE CLXXIIL

Comment le roy et le duc, après plusieurs préparatoires de guerre, par l'enhort des gens de bien, firent parlementer de la paix.

Or avoit le roy sa puissance toute preste à l'aultre lez; et approcha çà bas pour résister au duc Charles; et estoit tout son eflort et son préparement de fier encontre. Et combien que , au lez vers Bretaigne et Normandie , il avoit à pourveoir puissance en pareil comme ici, toutes-fois si amena-il tel effort par dechà et de si grand espoir, pour livrer guerre au duc Charles , que la pité eust été criminelle, si l'effect en fust ensievy. Dont, et pour ce qu'envers ce lez et du costé de ce duc de Bourgoigne tout l'aguet du roy pendoit et de son bien et de son mal, ce savoit bien, et que là devoit avoir principalement son œil, ly-mesmes y voult transporter sa personne et soy approcier d'autant près qu'il estoit possible et faisable. Et à où aultre part il pouvoit guerroyer contre son frère par commission de capitaines tels et tels, ici il vo'oit querir et prendre son adventure en sa propre personne ; car lui sambloit bien qu'il lui faisoit bon besoing , et que c'estoit le lieu et l'omme là où il convenoit que tout se monstrast ce que avoit en ly de sens et de vertu, mesme-

ment en tous les endroits de fortune prospère ut adverse. Car pour venir à la guerre, sine pooit-il à nul lez trouver dur à faire que ici. Si séoit bien doncques, et lui sembloit bien juste chose, qu'en ung tel lieu , 1à où pendoit toute la gloire et tout le pois de son royaume, et là où il savoit ung tel homme devant son front , digne de susciter et de commovoir un monde par son ost, que ly-mesmes meneur d'ung ost deffendeur , présentast sa personne là où il considéroit la gloire ou la ruine de son royaume. Et combien toutes-fois que la guerre çà et là y estoit délibérée , à l’estroit venir, et que en tel appareil si prochain lung de l'autre chacun fust assez réconforté en ce qui lui en pooit tourner à péril, les deux parties nientmoins, le roy et le duc, espoir par divine inspiration, et par fréquent enhort aussi des sages et preud hommes, premier que venir à confliction ne à l'aspérité du meschief, se misrent en devoir d'envoyer l'ung vers l'autre, et d'essayer par paroles si leurs deux contraires animacions et felletés se poroient mitiser et ung peu radoucir par moyens. Dont, se chacun de sa part voloit ung peu entendre à raison pour ung bon commenchement, les moyens poroient devenir cause d’une fructueuse joyeuse fin, entre les deux parties , salutaire. Et estoit en partie ceci principale cause pour laquelle le roy se vint tenir à Noyon, afin d'estre tant plus près pour les allàns et venans entre deux. Car , par le consentement des deux princes, la place de parlementer ensemble estoit ordonnée à Han en Vermandois, ville appartenant au Connestable, qui icy laboroïit et veilloit de tout son sens.