CHAPITRE CC
Comment les nobles qui estoient entour-du duc estoient mal édifiés et contens de ses hautaines paroles aux ambassades, par grand hauteur de corage dont ÿ ne se peut refraindre à l'heure.
Ce fut ici l’effect de la responce que le duc fit à Sainct-Omer aulx gens du roy, et dont la fin, comme vous oez, estoit dure et estrange à oyr, et non pas bien prise des gens mesmes du duc, pour ce quil y avoit de malvais agoust pour commander tacitement ung roy de France à tous les cent mille diables. Et sambloient à ceulx qui deuil y prenoient, qu'à ly mesmes il se fist grand blasme en ces paroles, considéré encore qu'il estoit subgect du roy, et honoré et paré des armes des fleurs de lys, la gloire et splendeur de son front et le plus cler de ses tiltres. Et en ce, quand il se nommoit Portuyalois, fut murmure aussi de ses propres gens , pour ce que tacitement contempnant le nom de France dont il estoit, ne se osa nommer Anglois là où le cuer luy estoit; mès se renommoit de la feue de sa mère, ancienne amie d'Angleterre et contraire à France. Ainsi doncques, jà-soit-ce que le temps d'alors portoit ainsi, que cestui duc Charles s'estoit de tous points esloignié de l'amour et affection envers France, fut complaint toutes-fois et durement mal pris entre ses propres gens, que tant publicquement et si irévérament il se osa estordre en ses paroles. Car quoique le maistre feust, ne quel ne com fait, eulx tous estoient en affection devers France , non pas vers Angleterre. Fut faite murmure aussi entre les plus sages, et qui beaucoup veu avoient, de son hault élevé siège qui, par excès de hauteur, passoit mode et riègle. Si luy fut imputé à merveilleuse élation de cuer mal loable, et par espécial parce que c’estoit envers ung roy de France, son souverain et le plus grand de la terre, envers lequel il se voloit extoller maintenant, ce sambloit, sous tiltre d’ennemisté que le roy lui monstroit, en ce qu’il portoit et soustenoit Warwyc encontre ly.
Parquoi , comme le roy lui monstroit la dent en soustenir son ennemy en contraire de leur
GEORGE CHASTELTAIN.
appointementf, avoit bien loy aussi, ce sambloit voloir dire, de monstrer son orguei envers le roy, pensant, en nature d’ennemisté , riens povir mesprendre , aveuques ce que son pooir sentoit gros et fier, et par lequel il espéroit encore, aveucques Éduard, le roy Anglois , tenir ledict roy encore en cremeur et soubs verge; car ne cuidoit point ne’ ne créoit que ce deust avenir en Angleterre, qui depuis avint. Et par ainsi, partie par chaleur de jeusnesse et en son premier haut vol, qui jà avoit exsécuté de haultes besognes, partie aussi par soy cognoistre redoubtablement fort et de chevance et d'ommes, et tout tourné en ennemisté et en haine envers cely qui son ennemi portoit contre ly, n’y avoit ne orgueil, ne beuban, ne rude parole, ne fiers mots qui lui pooient sambler vicieux ne de reprise, parce qu'à son ennemi on se doit monstrer tel pour tel, et qu'en ennemisté n’a point de courtoisie ; jà-soit-ce que je ne l'appreuve point ainsi; mès en cuer ennemi et felle, coustumièrement se trouve raison esteinte ; et là où raison faut , là est légier censentement à vice. |
