CHAPITRE XXXVII

Comment monseigneur le daulphin apprit à Bourges la nouvelle du traicté fait par son père le roy et mit ses places en deffence.,

Or estoit monseigneur le daulphin à Bourges qui véoit et oyoit Loutes ces choses, contraires à lui grandement et desespérables. Véoit le duc bourgoingnon son, beau-frère estre en grand effort et puissant devers le roy , et que par luy et à son appétit toutes les choses de ce royaulme se traictoient ; véoit à l’autre lez sa sœur estre accordée au roy anglois, avec l'adhéritement perpétuel de la couronne de France, contre tout humain droit et divin, et que, par ceste aliance et amityé incompatible , il seroit expuls et dejecté de son héritage piteusement , et frauldé par les deux puissances conjointes. Durement fust esbahy certes, et non merveilles. Et luy sembloit chose bien pénible et dangereuse moult, à résister à tout et pourveoir convenablement , combien que de nécessité il failloit faire vertu, et prendre regonfort bien en austère fortune, comme amye, là où gist gloire et espreuve des haulx couraiges. Provision toutesvoies possible pour lors, et la meilleur qu’il pot, il y mist; et garnit ses villes prestement par tout, icy et là, et y mist ses plus féables et vaillans capitaines ; à Melun, le seigneur de Barbasan ; à Montreau , le seigneur de Guiery et messire Robert de Loire ; à Montargies , le bastard de Vauru , et Pierron Luppel à Maulx , à compaignie du seigneur de Gamaches ; et ainsi partout, là où il estoit besoing , mist et assist ses gens pour mainteair la frontière contre ses ennemis ; et au remanant se pourvéy de gens d'armes le plus qu’il povoit pour tenir les champs encontre eulx , attendant l'aventure que Dieu luy vouldroit envoyer.