CHAPITRE LXXIV

Encore du siége de Sainct-Ricquier.

Le Pont-de-Rémy doncques bruslé ainsi et mis en gast, le duc tantost s’en party et vint devant Abbeville à toute la chevallerie de son hostel , et laissa la route de gens - d'armes logiés aux fourbours. Si est vray que pour at: tendre aulcunes communes des bonnes villes qui luy avoient promis service , il se tint par aulcuns jours en ladicte ville, jusques vers la fin de juillet que toutes ses besoingnes estoient apprestées pour aller mectre le siège à Sainct Ricquier, dont il n'y a que deux pettes lieues et plain chemin depuis Abbeville, duquel il print son partement en noble et fier arroy de prince. Et vint jusques audict lieu sonnant trompettes et clairons tellement que l’ayr en retentissoit et la terre. Luy de son corps pour le dangier de sa personne, ne fut pas souffert à estre logié en gens-d'armes sur les champs, en dangier du traict et des canons dont ils estoient largement four-

ais dedens ; mais se logea dans La Ferté qui avoit esté bruslée nagaires , mais la muraille estoit remise saine et entière assez pour povoir porter garant encontre traict. Si s'en aisa ledict duc au mieulx qu'il povoit , et les vaillans chevaliers, dont il en y avoit moult, et les aultres gens-d'armes et communes se logèrent ès lieux qui leur estoient députés par conseil tout à l'entour , l’ung ici, l'aultre là ; celluy de Luxembourg devant la porte de Sainct-Jehan , au lez vers Auchy, le seigneur de Croy auprès de la porte de Sainct-Nicolas, devers Abbeville. Et à la porte du Héron qui est située en lieu hault vers le Crottoy, là n'avoit nulluy, ne sçay à quelle cause, ne si ainsi il fut conclud de faict appensé; mais sauvément povoient saillir hors les assiégés quand il leur plaisoit, et recevoir gens aussi et messaiges, fust de jour, fust de nuyt. Toutesvoies, ne povoit estre par faulte de gens que ladicte porte ne fust asségée, car au regard de la ville qui ne comprend pas grand tour , le duc avoit bien six mil combattans avec luy, et toutes gens fais et duys de guerre la pluspart.

Or faisoient les assiégans fièrement leurs approches, et labouroient à toutes heures pour venir joindre à leurs murs, car plus en estoient près, plus en estoient asseurs, et les aultres plus grevés ; si y avoit honneur, vous dis-je bien, très grand en approchier, car moult y faisoit périlleux, pour la cause que les champs sont beaucop au descouvert entre la ville et que ceulx de dedans estoient vaillans hommes, aigres et coragieux, et tous expers et reconfortés de péril. Car certainement, en la première venue , ils firent merveilles d'armes, et saillirent hors jusques à leurs barmères encontre leurs ennemis, au moins pour montrer signe de couraige , posé qu'ils m'avoient puissance de les rebouter. Dont, quand nécessité les constraindoit de eulx retraire en leur fort et de recourir à la deffence de leurs murs, il ne faict à doubter que leur diligence ne fust à redoubter beaucop et que elle donna du meschief largement à ceulx du dehors, comme d'autre part il a esté de coustume en tel cas, et comme il advient tous les jours ; meismes souvent les plus vaillans sont les premiers attains et en-

voyés, Car ce Sont ceux qui se boutent aux périls. Chascun en son endroict fit bien et le mieulx qu’il polt, lung en grevant par dehors, l’aultre en deffence par dedens. Et tiroient l'ung contre l’aultre fièrement, et faisoient tel estourmys que ce sembloient tonnoires et fouldres qui descendoient du ciel à tous lez. Et certainement beaucop leur donua à souffrir l'ost par les bombardes et aultres gros veuglaires qui leur desrompoient leurs murs et leurs portes et adommageoient fort leur ville , et dedens tuoient gens et abattoient maisons. Et pareillement en tuoient-ils tous les jours de ceulx de dehors. À qui le malheur eschéoit , il le recevoit, et qui ne payoit le payaisre de son corps, il eschappoit quicte pour l'aultrui. Or ne restoit jour que ceulx de Harcourt n'envoyoient gens et messaiges dedens la ville, et qu'il ne leur requist de leurs affaires et nécessités : s'il leur failloit ne vivres, ne riens, ils trouveroient manière de les furnir. Si leur signifioit comment il leur avoit envoyé en toutes les frontières du daulphin de deçà Paris, en Champaigne , en Vallois , en Brice et Compiègne et ailleurs , requérir et prier chacun et tous capitaines que : ils voulsissent venir à secours à lJadicte ville de Sainct Ricquier, ou pour lever le siège ou pour combattre le duc de Bourgoingne qui estoit devant euix fier et puissant. Si requirent auxdivts assiégés qu'ils ne se déconfortassent de rien et qu'ils se tinssent en bon espoir, Car certainement ils auroient secours, ce savoit bien. Sy furent pour dire vray lesdicts assiégés tous resbaudis et re-soulagiés de leurs continus labeurs ; et les portoient plus à doux que ils n'avoient faict par avant. EL à ceste occasion firent plusieurs saillies pour monstrer verlu et couraige à leurs ennemis, et les vindrent attamer en leur siège , là où ils pensvient leur avantaige. Tels fois fut à leur proulit, tels fois à leur perte aussi ; mais tant lcur en prist bien que à deux ou trois fois , ils prindrent cinq ou six gentilshommes bons prisonniers, et les amenèrent avec eulx. Dont messire Hémon de Bouber en fut l'ung; les aultres, Henry Lailemant, Jehan de Courcelles, Jehan de Crèvecœur , Dancelot, et aulcuns aultres non point de si grand nom.