LIVRE Il, CHAP. XXXIV

puis se meirent ensemble aux champs où les Anglois estoient, mieulx aimants mouriren eulx deffendant qu’en fuyant ; et commencèrent à tirer sur les Anglois et Gantois. Là y eut ung Anglois bien monté, au poing la lance, lequel vint se férir entre eulx, pour eulx desfoucquier; mais pour ce ne se meirent en desroy, ains commencèrent à tirer sur luy et eulx partir en deux pour faire voye au cheval dudict Anglois; mais aussitost que ledict Anglois veit et perceut leur valliance et hardiesse, doubtant aussy que secours ne leur vinst, vira son cheval et s’en retourna, et toute sa compagnie aussy. Sy se partirent et s’en allèrent, et laissèrent quoys lesdicts archiers. Mais pour ce ne demoura mie que lesdicis archiers ne tirassent après. Et feut le cheval dudict Anglois attaint de plusieurs flèches ; ne sçcay s’il feut navré, ou nul de sa compagnie. Et lorsque ceulx qui s’estoient mis sur le pont, quy estoient plus de quarante paysans , choisissèrent les Anglois et Gantois ravaller, sy laissèrent le pont et se bouttèrent ès bois assez près d’illecq. Lors les dessusdicts archiers remontèrent à cheval et s’en rallèrent franchement ; et feirent tant qu'ils retrouvèrent leurs gents; et ainsy par la valliance de leurs corps eschappérent.

En une autre course qu’on feit vers Gand, feurent prins aulcuns de la Verde Tente, et ung de leurs capitaines feut esquartelé, et ung de ses compagnons pendu.