CHAPITRE XLII

Du crucl assault que les Gantois feirent à la ville d’Aloste ; de la valliance de messire Loy; de Viefville, chevallier ; et comment messire Anthoine de Wissocq, chevallier, cuida surprendre l'ost des Gantois.

Le huictiesme jour de may mil quatre cents cinquante-trois, vuidèrent de la ville de Gand bien quatorze mille Gantois à pied, bien embastonnés, et environ deulx cents hommes à cheval, et s’en .allèrent devant la ville d’Aloste, pour assiéger ou prendre ladicte ville ; et, conime ils approchèrent, ung chevallier, nommé messire Loys de Viefville, lequel estoit en la ville, et avecques luy environ quatre cents combattants,

(4) Attaché. (2) Marin, matelot

vuida de ladicte ville. Et n’estoit point à celle heure dedans ladicte ville messire Anthoine de Wissocq, lequel en estoit capitaine pour lors. Et alla ledict messire Loys faire une escarmouche aulx Gantois, lesquels estoient de cheval, et venoient devant ceulx quy estoient à pied ; et férit en eulx tellement que ceulx de Gand reculèrent : et feut icelluy quy portoit l’estendart féru d’une lance tout oultre le corps, et mourut, et avecques luy plusieurs aultres Gantois; et rebouttèrent tellement lesdicts Gantois, qu'ils feurent constraints d’eulx retraire avecques les gents de pied. Après ce faict, lediet messire Loys se retourna et rentra dedans la ville; et celle nuictles Gantois se logèrent autour d’icelle ville ; et sitost que le lendemain le jour adjourna, les Gantois assaillirent la ville, laquelle feut de toutes parts fort bien deffendue. Toutesfois lesdicts Gantois, de toutes leurs forces assaillirent ung boullevert; et sy grand assault v livrèrent qu'ils y tuèrent six hommes d'armes de la garnison. EL jà euissent entres dedans le boullevert , quand ledict messire Loys y vint, lequel reboutta les Gantois; et y mourut des Gantois à ce rebouttement plus de vingt. Etde tout costel estoit l’assault fort. Et bien aussy se deffendirent ceulx de la ville. Et dura l’assault trois heures , et en y eut des morts plusieurs d'’ung costel et d’aultre. Et tant dura l’assault que les Gantois feurent trop travaillés et se retirèrent , et se logèrent au-tour de la ville.

Et durant ledict assault, on estoit allé dire à messire Anthoine de Wissocq, lequel cstoit allé se battre le jour de devant à Terremonde, comment que les Gantois estoient devant Aloste et l’assailloient. Lors ledict messire Anthoine et messire François l'Arragonois, atout bien six cents combattants, vuidèrent de la ville de Terremonde pour aller assaillir les Gantois quy estoient devant Aloste et l’assailloient. Mais jà estoit l’assault failly quand ils approchèrent de la ville; et s’estoient mis lesdicts Gantois en belle ordonnance, Car ils estoient advertis de la venue des Picards. Quand lesdicts Picards veirent les Gantois en sy grand nombre et en sy belle ordonnance, sy doubtèrent de frapper en eulx; et se conclurent qu'ils se logeroient assez près d’eulx , et que le lendemain au matin les assailleroient ; mais celle nuict et par nuict lesdicts Gantois se partirent de devant Aloste et s’en rallèrent à Gand avec leurs chars et engins.