CHAP. X

En ce tempore!, la ville et cité d'Arras, et pour certain touts ceulx quy y demouroient, feurent sy escandalisés par tout le royaulme de France et ailleurs d’estre vauldois, qu’à peine voulloit-on loger les marchands et aultres de ladicte ville; et mesmes les marchands en perdirent leur crédence; et voulloient ceulx à quy ils debvoient estre payés de ce qu’ils leur debvoient, de poeur qu'ils ne fuissent prins comme vauldois, par quoy ils euissent leurs biens confisqués.

Et à certes, en ce tempore il n’y avoit sy notable homme ès ville et cité d'Arras, ne sy bon chrestien, quy bonnement endurast , pour quelque besoigne qu’il euist, tant feust nécessaire , aller hors de la ville, de poeur d’estre prins comme vauldois. Et pour certain, il ny avoit nesy bon ne sy léal que, s’il feust allé au moings pour l’espace de quinze jours ou plus, que le plus du menu peuple n’euist dict qu’il s’en feust allé de poeur d’estre prins comme vauldois; et eust-on dict publicquement qu’il estoit vauldois. Et comme les vicaires de l’évesque feuissent assez advertis de la grande crainte et malle renommée que ceulx de la ville d'Arras avoient par touts les pays, ils feirent bien preschier publicquement que nuls ne murmurassent contre eulx ne ceulx quy estoient commis avecq eulx; et que n’euissent nulle poeur d’estre accusés sans cause , car ils n’en faisoient nuls prendre comme vauldois quy ne feuissent accusés de huict ou dix tesmoings, lesquels avoient estéen ladicte vaulderie, et illecq les avoient veus; mais despuis feutsceu, qu’aulcuns feurent prins pour ledict cas , lesquels n’avoient esté accusés que d’ung ou de deulx, ou de trois pour le plus.