LIVRE IV, CHAP. XX VIII
Tacquet, lequel estoit prisonnier pour ledict cas, quatre cents livres.
Plusieurs aultres choses plaidoya et dit publicquement ledict Popincourt, pour ledict seigneur de Beauffort, et moult terribles et moult chargeables contre ceulx quy s’estoient meslés de l’inquisition de ladicte vaulderie. Et après ce que ledict Popincourt euist tout dict et parlé ce qu’il vouloit dire, il feut dict par parlement : que ledict seigneur de Beauffort seroit eslargy de prison; avecq ce, que ung huissier du parlement iroit,aux despends dudict Beauffort, en la cité d'Arras, ès prison de l’évesque ; et que Jehan Tacquet, Jehan du Bois, et la femme qu'on nomme Franche-Comté, lesquels avoient esté preschiés comme vauldois, seroient eslargis. Lesquels on vint quérir environ dix jours après, et feurent menés à Paris. Et assez tost après qu'ils feurent venus à Paris, feurent touts eslargis pour aller où bon leur sembleroit ; et revint chascun en sa maison.
Et disoient touts : que oncques n’avoient esté en ladicte vaulderie, etque cequ'’ils avoient dict avoit esté par force de gehenne et poeur d’estre ards. Et combien que chascun s’en retournast en sa maison, sy estoient toutsdis leurs procès pendants audict parlement, et y feurent longtemps après; et sy n’estoit cause déterminée, s'ils avoient esté condampnés, ne prins à tort et à droit; et ralloient quelquefois à Paris, pour solliciter leur procès.
Environ ce temps aussy, ou assez tost après, vindrent deulx commissaires de Paris, docteurs en théologie, c’est à sçavoir, l’ung jacobin et inquisiteur de la foy en l’évesquié de Paris, l’'aultre, ung ancien religieulx, et aultres députés avecq eulx. Lesquels commissaires feirent attacher lettres aux portes d’Arras, où il avoit escript : que s’il estoit nul quy sceust que dire sur Guillaume le Febvre, bourgeois d’Arras, lequel avoit esté excommunié comme vauldois, pour ce qu’il s’estoit absenté, qu'ils vinssent à eulx, et ils les oyroient en dedans certain jour. Et ce pendant qu'ils feurent à Arras, oyrent plusieurs tesmoings qu’on leur administra sur la purge dudict Guillaume le Febvre , lequel se purgea à Paris sous l’évesque de Paris. Et oyrent entre les aultres plusieurs tesmoings quy avoient esté prins comme accusés de ladicte vaulderie. Devers iceulx commissaires vindrent les vicaires de l’évesque d'Arras, lesquels leur
monstrèrent les procès de ceulxquy avoient esté exécutés ou preschiés comme vauldois, et par lesquels ils pooient voir comme ledict Guillaume le Febvre estoit accusé. Après lesquelles choses faictes, lesdictscommissairesretournèrent à Paris, et emportèrent les coppies des procès faicts contre ceulx quy avoient esté prins, exécutés et preschiés comme vauldois. Lesquels procès veus et visités à Paris, par l’évesque de Paris, l’archevesque de Raims, et inquisiteur de la foy ès marches de France, avec plusieurs aultres docteurs en théologie, et oyes les propositions dudict Guillaume le Febvre, feut, par ledict archevesque de Raims, Guillaume le Febvre déclaré délivré, absout et innocent dudict crime de vaulderie. Et environ le mois de septembre, feut renvoyé audict Guillaume le Febvre action pour poursuivre les vicaires dudict évesque d’Arras, pour estre réparé de son honneur, et pour les despends et dommaiges qu’il y avoit mis.
Environ ce temps aussy, revint en la ville d'Arras Hotin Loys, sergeant d’Arras, lequel, comme dict est, avoit esté excommunié comme vauldois, et avoit esté à Rome, d’où rapporta lettres du pape, comme il le renvoyoit à maistre Gilles Carlier, doyen de Nostre-Dame de Cambray, et à maistre Grégoire Nicole, official en ladicte église, pour le punir sy qu'ils trouveroient qu’il auroit desservy ; lequel n’eut quelque punition, ains feut sergeant comme paravant.
