CHAPITRE XXX
Comment le duc de Bourgoingnealla à Avesnes, en Haynault, devers le nouvel roy de France Loys; et comme on y feit le service du roy Charles, et aultres choses. ,
Assez tost après que le duc Philippes de Bourgoingne feut adverty de la mort du roy de France Charles, se partit de Hesdin ; et au jour déterminé entre le roy Loys et ledict duc, il se trouva en Avesnes en Haynault devers ledict Loys. Auquel lieu d’Avesnes feut faict le service dudict roy Charles moult honnorablement; et feurent dictes les vigilles le dimanche deuxiesme jour d’aoust, et le lendemain la messe, et y olt moult grands luminaires, comme en tel cas appartient. Et feut audict service le nouvel roy, vestu en deuil tout de noir ; et le menoit le seigneur de Montauban. Après ledict roy] alloit le duc de Bourgoingne, vestu en deuil pareillement; et le menoit le seigneur de Croy. Après lequel ducalloit le comte de Charrollois, fils dudictduc, vestu en deuil comme les aultres ; et le menoit le seigneur de Contay. Après alloient le comte d’Estampes, Jacques, frère du duc de Bourbon, Adolphe de Clefves, et plusieurs aultres grands seigneurs. Et prestement la messe du service dicte et le disner faict, ledict roy Loys se vestit de pourpre et s’en alla à la chasse. Et est la manière que, sitost qu’ung roy de France est mort, son fils aisné ou son plus prochain est roy; et n’est point le royaulme sans roy; et pour ceste cause le nouvel roy ne porte de deuil, ains se veste de pourpre ou de rouge, en signifiant qu’il y a roy en France.
Le lendemain du service, quy feut le quatriesme jour d’aoust, le roy Loys partit de Avesnes, pour tant qu'il y avoit trop peu de place; car touts les jours gents venoient de
touts lez vers luy, et à peine pooit-on avoir place pour loger à quatre à cinq lieues près Avesnes; et s’en alla vers Raims, et passa par le pays de Thierache ; et le cinquiesme jour du mois d'aoust le duc se partit, et s’en alla à Sainct-Quentin en Vermandois, auquel lieu il debvoit trouver les nobles de ses pays.
Le roy Loys et ledict ducavoient prins jour d’eulx trouver ensemble en la ville de Laon, pour aller à Raims sacrer ledict roy Lovys.
