CHAPITRE XXYI

Comment le comte de Charrollois print congié à son père, et des ambassadeurs du roy quy vindrent vers luyÿ; et coinment il se partist pour aller en France avec grosse artillerie.

Environ le quinziesme jour de may, l’an de grasce mil quatre cents soixante-cinq, le comte de Charrollois, quy scavoit que toute son armée estoit preste, réservé ceulx de Bourgoingne, lesquels estoient encoires en Bourgoingne touts prests, luy estant en la ville de Bruxelles, print congié au duc son père. Après congié prins se partist le comte et s’en alla au Quesnoy en Haynault , où illeeq l’attendoit une ambassade de Bretaigne et uneambassade du roy de France, dont estoit chief messire Thiebaut de Sainct- Pol, frère dudict comte Loys de Sainct-Pol, évesque du Mans, lequel évesque, comme dict est cy-dessus, s’estoit rendu moisne en l'abbaye de Clervaulx , et laissié grandes terres et seigneuries ; et cuidoit-on que ce feut par grande dévotion ; mais tantost qu’il feut moisne, il ne cessa tant qu’il feust abbé d’Igny, et d’abbé d’Igny évesque de Mans, et sur toutes choses aimoit deniers, comme on disoit ; et disoit-on que ledict évesque y besoingna peu ou néant.

Ce faict, le comte de Charrollois se partist du Quesnoy-le-Comte en Haynault, le quinziesme jour de may, avecq toute son armée, et s’en alla à Hencourt , entre Crèvecœur et Sainct- Quentin, auquel lieu l’attendoit toute son artillerie, dont il avoit foison; car parmi la ville d'Arras avoit passé deux cents trente - six chars ehargés d'artillerie, tant bombardes , mortiers, veuglaires, serpentines et aultres traicts à poudre, et tel qu’il fault à ost, laquelle artillerie avoit esté prinse au chasteau de Lille; et disoit-on que aultre grande quantité d’artillerie estoit passée par Cambray, que on avoit prinse à Bruxelles et à Namur, et tout vint en l’ost du comte à Henceourt. Le comte se partist de Hencourt et s’en alla à Rossy, à deulx lieues près Péronne, et illecq se tint aulcuns jours accompagnié de tout son ost, quy estoit le plus bel et plus grand que oncques duc de Bourgoingne eust faict de gents de guerre, sans commune. Ceulx de Péronne cuidoient et aitendoient de jour en jour que le comte de Charrollois les deubt assiéger ; mais le comte pensoit à

touta aultre ehoge,