CHAPITRE XX VII

Comment le comte de Charrollois passa la rivière de Somme pour tirer en Frauce, et des villes de Bray, de Neelle, Royce et Mont-Didier qu'il meit en son obéissance.

Le quatriesme jour de juing mil quatre cents soixante-cinq, le comte de Charrollois et toute son armée s’en alla à Bray-sur-Somme; et luy apportèrent ceulx de la ville les clefs ; et le septiesme jour, le comte de Sainct-Pol et le bastard de Bourgoingne, et leurs gents, allèrent devant Neelle en Vermandois ; et comme ils délibérassent d’assaillir la ville, ceulx de la ville se rendirent à eulx par telle condition quehuict hommes d’armes et six vingts archiers, lesquels estoient dedans en garnison, s’en partirent saulfs, leurs vies, chevaulx et armes ; mais les archiers laissèrent tout et s’en partirent en leurs pourpoints ou paletots, en sa main chascun ung baston blancgq. Illecq feut prins le seigneur de Neelle et détenu prisonnier. Et ce propre jour le seigneur de Haultbourdin, bastard de Sainet- Pol, accompagnié d’aulcuns gents de guerre, allèrent à Roye en Vermandois, et avallèrent des échelles ès fossés pour l’assaillir. Ce voyants ceulx de la ville se rendirent à luy pour et au nom du comte de Charrollois. Sy entra ledict bastard dedans la ville, en laquelle estoit la comtesse de Nevers ; à laquelle comtesse, femme dudict comte, on donna congié de soy retraire où bon luy sembleroit, sans luy faire grief ny injures. Laquelle comtesse ung jour ou deulx après se partist et s’en alla à Compiègne, et là envoya Adolf de Clefves atout cinq ou six cents combattants; et environ deulx jours après, se rendit la ville de Mont-Didier au comte de Charrollois, en laquelle estoit Hue de Mailly, seigneur de Boulliencourt, hardy et valliant chevallier, quy tousjours avoit tenu la partie de Bourgoingne, lequel en feut faict capitaine ; et estoient ceulx de Mont-Didier ceulx quy plus aimoient de toutes les terres dessus la rivière de Somme le duc de Bourgoingne, et avoient tousjours aimé.