CHAPITRE XL

Comment ceulx de la ville de Dynant pendirent la pourtraicture du comte de Charrollois devant Bouvynes; et des opprobres qu'ils disvient de luy ; et aultres choses.

Environ ce temps, ceulx de la ville de Dynant, quy estoit une ville au pays de Liége, la plus forte et la plus riche beaucoup que la cité de Liége, car oncques n’avoit esté prinse ny gagnée, combien que plusieurs empereurs, roys et ducs y euissent mis plusieurs fois le siège, et jusques à dix - sept siéges à plusieurs et divers temps, ceulx de Dynant, quy de tout temps avoient pillié leurs voisins, quand guerre y estoit, et tout apporté à Dynant (et se y faisoit-on les candrelats et toute fondure de léton et métal de cuivre), assez tost après la bataille du Mont-le-Héry, cuidants que le comte de Charrollois olt esté desconfit, s’avisèrent d’une grande folie en monstrant leur animé couraige et la haine qu’ils portoient au duc de Bourgoingne et son fils; car, par leur oultrageulx couraige, ils feirent faire la pourtraicture du comte de Charrollois, laquelle ils vestirent d'armes du comte, puis en grande multitude et armes allèrent faire droict devant la ville de Bouvynes, quy estoit au duc de Bourgoingne , et illecq feirent ung gibbet et y pendirent celle pourtraicture, en disant à ceulx de Bouvynes : “ Voilà le fils de vostre duc, le faux trahistre, le « comte de Charrollois, lequel le roy de France “ a faict ou fera pendre commeil est là pendu; il « se disoit fils de vostre duc, mais il estoit vil- « lain bastard, et feut changié en enfance au fils « du seigneur de Hainsbergue, nostre évesque. « Cuidoit - il ruer jus le roy de France? » Plusieurs aultres vilaines paroles dirent du duc et de son fils, menassants le duc de destruire et ardoir ses pays, comme fols et oultre-cuydiés ; car ils n’avoient cause de ce dire ; car la mère du comte , femme du duc , estoit une des bonnes femmes de son corps quy feust sur la terre.

Desquelles opprobres et villenyes assez tost après le comte feut adverty, et en feut moult troublé; et dit qu’ils le compareroient, comme ils feirent, ainsy qu’il sera dict cy-après.