LIVRE V, CHAP. XLVIL

Audict mois d’aoust, le vingt-sixiesme jour, en la villede Boulongne sur mer, feurent prins le chastelain et le sergeant du chastel, lesquels avoient vendu la ville et le chastel aulx Anglois de Calais et de Guisnes, quy y debvoient entrer le vingt-huictiesme jour ; et debvoient les dessusdicts boutter le feu en la basse Boullongne, et entre tant que on olt allé au feu, ils debvoient mectre lesdicts Anglois au chastel ct en la ville, et tuer tout , réservé ceulx que ledict chastelain et sergeant avoient exceptés. De laquelle trahison ils se descouvrirent à ung aultre sergeant quy leur avoit faict serment d’estre des leurs; lequel sergeant se repentit, et dit la trahison au mayeur de la ville, lequel ÿ pourveut tellement que lesdicts chastelain et sergeant feurent prins; lesquels confessérent leur trahison; pourquoy ils feurent, le deuxiesme jour de septembre, descapités, et leurs corps pendus au gibbet. Iceulx exécutés estoient ceulx propres quy avoient tant faict que le fils du seigneur de Croy s’estoit party du chastel, dont il estoit capitaine ; et y avoient faict entrer, au commencement du caresme dernier passé, les gents du comte de Charrollois, lequel comte avoit donné aulxdicts chastelain et sergeant touts les biens estants au chastel, appartenants audict seigneur de Croy, et moult de biens luy avoit faict et avoit intention de faire.