CHAPITRE XLIX

Comment les Liégeois feurent desconfits par les gents du duc de Bourgoingne, à Montenacq, et jusques au nombre de deulx mille ou plus de morts.

L'an de grasce mil quatre cents soixantecinq, le dix-neuviesme jour d’octobre, le comte de Nansso, le séneschal de Haynault, le seigneur de Grutuse, le seigneur de Reubempré grand bailly de Haynault, et aultres chevalliers et escuyers et gents de guerre, jusques au nombre de dix-huict cents combattants ou environ, se partirent ensemble et entrèrent au pays de Liége, bouttants les feus en plusieurs lieulx, et

(1) Eclair. (2) Nord,

ardants plusieurs gros villaiges et maisons ; et en passant assez près d’ung gros villaige, nommé Montenacq, quy est à dire en francois Montigny, entre Sainct-Tron en Hasebain et Verlo, à environ cinq lieues de la cité de Liége, ung grand nombre de Liégeois, lesquels se tenoient à Montenacq, et gardoient le villaige, où il y avoit bien trois cents feus, lequel ils avoient clos et fort fortifié de barrières, tellement que on n’y olt sceu entrer, et y estoient environ quatre mille combattants, quand ils feurent advertis que les gents du due passoient par emprès eulx, lesquels ne contendoient que de passer sans les assaillir, car ils estoient trop fort fortifies, en grand nombre vuidèrent du villaige, et se meirent en ung lieu où les gents du duc debvoient passer, pour les combattre et ruer jus; et illecq s’encloyrent et feirent ung fort de leurs engins et charrois, attendants les gents du duc. Lesquels assez tost vindrent illecq, et trouvèrent iceulx Liegeois enclos et fortifiés comme dict est. Sy prindrent conseil entre eulx de les combattre, mais qu'ils les puissent faire issir de leur fort. Pour lesquels faire issir feirent signe de retourner et fuire de poeur d’eulx, affin qu’ils vuidassent, comme ils feirent; car prestement qu'ils les veirent tourner le dos, cuidants qu'ils fuyssent, vuidèrent de leur fort pour aller après eulx.

Ce voyant par les gents du duc, sy retournèrent sur eulx ; et illecq y olt grande bataille; mais les Liégeois tindrent comme riens, ains se meirent en desroy et en fuite, et feurent rués jus; et y en demoura sur la place deulx mille deulx cents ou environ de morts ; et des gents du duc on ne poeult scavoir qu’il en mourust que ung archier.