CHAPITRE Y

L'assemblée que les enfants d'Orléans, avecques ceulx de leur party, feirent en la ville de Chartres.

En l’an 1410, les enfants d'Orléans, le duc de Berry, de Bourbon, et aultres seigneurs de leur party, s’assemblèrent en la ville de Chartres, et firent grand mandement de gens d’armes, entre lesquels estoient les comtes d’Allenchon et de Erminach; et envoyèrent en plusieurs bonnes villes lettres pour les attraire à eulx, en remonstrant que le roy et son royaume estoit mal gouverné. Leroy leur manda et commanda qu'ils renvoyassent leurs gens d'armes sans ainssy gaster son royaulme ; mais ils n’en voulurent rien faire, disant que jusques à che qu'ils auroient audience devers le roy ils ne se partiroient. Le roy renvoya de rechief devers eulx, afin que s’ils vouloient venir devers luy à simple compaignie, il en estoit content, mais ils n’y voulurent obéir.