CHAPITRE IX

Quand le duc d’Orléans olt veu les responces du duc de Bourgongne, il se prépara de tous points à lui faire guerre ; et envoya bouter gens de guerre en garnison ès villes de Roye, Ham, Charny, Clermont et aultres places là environ. Les quelles garnisons se prinrent à courre en Arthois et ailleurs, sur les terres de ceulx qui tenoient la partye du duc de Bourgongne. Et pareillement le duc de Bourgonge mist garnisons ès villes et forteresses, sur la frontière et allencontre des Orliénois. Ainsy commencha pays à destruire; mais touttefois, le duc de Bourgongne avoit adonc le roy de son party, par le moyen de ceulx quy le gouvernoient et estoient entour dé luy. |

Pour che tamps estoit cappitaine de Paris le bon Walleran de Sainct-Pol. Avant luy estoit Jehan de Luxembourg son nepveu, quy depuis fut nommé comte de Ligny, et fut chevalier de l'ordre de la Toison-d’Or, qui en son tamps fit degrandes vaillances. D’autres genset seigneurs de Picardie estoient avec le roy ; c’est à savoir messire Jehan de Thorsy, évesque de Tournay, le vidame d'Amiens, Antoine de Craon, le seigneur de Helly, Charles de Savoisy, Antoine des Essarts, Jehan de Courcelles, et aultres qui du tout estoient Bourguignons; de laquelle chose les Orliénois estoient moult desplaisants; et se mirent sus à grand’ puissance, et commencèrent à gaster le pays. |