CHAPITRE XIX

La délivrance du seigneur de Croy et des enfants du duc de Bourbon; et comment le seigneur de Croy feut fait gouverneur du Boullcnois, chastellain de Bray-sur-Somme, et grand boutciller de France.

Au mois de mars ensuivant, à la prière et requeste de la duchesse de Bourbon, fille du duc de Berry, fut, par le duc d’Orliens, le seigneur de Croy mis à plaine délivrance de la prison où il avoit longuement esté ; et fut envoyé des gens du duc d’Orliens jusques auprès de Paris; et à son partement promit sur sa foi de tant faire vers son maistre le duc de Bourgongne que les enfants de Bourbon, qui estoient prisonniers , seroient délivrés. Et quand il fut venu à Paris, le duc de Bourgongne et le duc de Guyenne le rechurent à grand’ joie. En briefs jours après, le seigneur de Croy fit requeste, laquelle avoit promis, de la délivrance des enfants de Bourbon, laquelle lui fut accordée de par le roi. Si furent mandés au chasteau de Renti, et furent amenés à Paris, et de là furent renvoyés franchement sans riens payer ; et les conduisit messire Jean de Croy jusques aux terres du duc de Berry ; mais le fils de messire Manssart du Bois, qui avoit esté pris avec eux, demeura prisonnier au chasteau de Renti. En outre, le seigneur de Croy, par l’ordonnance et consentement du duc de Bourgongne, fut ordonné de par le roi gouverneur de la comté de Boullogne et chastellain de Bray-sur-Somme ; et encore lui fut donné derechef, à la requeste du duc de Bourgongne, l'office de grand boutillier de France, et à messire Pierre des Essarts, prévost de Paris, se lui fut baillé l'office d’estre maistre des eauwes et forests, lequel tenoit par avant Walleran, comte de Saint-Pol, connétable de France.