CHAPITRE XXI
Comment les siéges furent mis devant les ville « chastéau de Daufrons, €t ville et chasteau de Saint-Remy, tenant le parti des Orlicnuvis, qui furent rendus au roy.
Le roi de Secille, par l’ordonnance du roi, se partit de Paris, le mardi vingt-huitiesme
d'avril, moult bien accompagné de gens d’armes, et alla mettre garnison par toutes ses villes et forteresses de ses pays d'Anjou et domaines à l’encontre des comtes d’Alenchon et de Richemont. D’autre part, furent envoyés au pays d'Alenchon, pour le mettre en l’obéissance du roi, messire Anthoine de Craon et le Borgne de Heuze, bien accompagnés de gens de guerre. Lesquels mirent le siége devant la ville de Danfrons, laquelle leur fut rendue ; mais le chastel ne polrent avoir. Toutefois ils l’asségièrent de tous côtés. Quand ceux du chastel se virent asségiés, ils envoyèrent devers le comte d’Allenchon , lui requérant que les voulsist secourir. Si leur promit secours en briefs jours, disant qu’il combatteroit ceux qui tenoient le siége. De laquelle response furent advertis ceux qui tenoient le siége. Si mandèrent incontinent au roy qu'il leur envovast aide ; laquelle chose il fit ; et y envoya le comte de Sainct-Pol, connestable de France, et un des maréchaux de France, à grand puissance.
Et pareillement le roy de Secylle y envoya une belle compaignie ; mais au jour que le comte d’Alenchon avoit assigné journée de comhattre, il n’y vint point. Lors le connestable et autres, véans que leurs adversaires ne s’estoient apparu pour lever le siége, firent édiffier devant le chastel de Danfrons une forte bastille, dedans laquelle, et en la ville, ils laissèrent grans gens pour asségier ceux du chastel; puis se partit le connestable, et alla mettre le siége devant Saint-Remy-au-plain, etenvoya à Vernon querre les bombardes et engiens de guerre pour amener au siêge. En la compagnie du connestable estoit Jehan de Luxembourg, son nepveu, et plusieurs autres notables seigneurs, jusques au nombre de douze cents lances et grand nombre d’archers, lesquels tous ensemble se logèrent en la ville de Sainct-Remy, et'allenviron, moult forte place et bien garnie de gens de guerre. Le connestable les fit sommer d’eux rendre en l’obéissance du roy ; ils le refusèrent. Après icelle sommation, y jetèrent bombardes et canons, dont la place fut fort battue et adommagée. Durant le siége, le seigneur de Gaucourt, messire Jean de Trèves et autres capitaines, tenans la partie d’Orliens et d’Alenchon, se mirent ensemble atout grand nombre de combattants, le plus secretement
qu’ils polrent, en intention de frapper sur ceulx
MÉMOIRES DE SAINT-REMY
du siége, cuidans iceux trouver à despourveu; mais de leur venue et de leur puissance fut le connestable adverti. Si fit hastivement ordonner ses batailles aux champs. Son ordonnance faite et véant ses ennemis, pluiseurs escuyers, espérans la bataille, lui requirent l’ordre de chevallerie. Le connestable en fit de nouveaux chevaliers. La fut fait chevalier Jehan de Luxembourg, Jean de Beaussault, Allart de Harbaumes, le Brun de Sains, messire Robert de Pierrecourt, Regnaut d’Azincourt et pluiseurs autres.
Quand le connestable eut ordonné ses batailles, il se mit à pied auprès de sa bannière. Les Orlienois qui, à cheval estoient, se prinrent à courre par force grande dedans la ville Sainct-Remy, cuidans y trouver leurs ennemis, pensans qu’ils ne fussent point advertis. Quand ils perchurent qu’ils estoient en bataille, ils se assemblèrent faisans grands cris. Les hommes d'armes à cheval se frappèrent devant un petit nombre des archers du connestable et en tuërent de vingt à trente; mais le connestable et ses gens tinrent ordonnance, et se gouvernèrent jsi vaillamment que les Orlienois furent desconfits, et en brief se mirent en fuite. Les gens du connestable se montèrent à cheval, et là y ot grand’ chasse et poursuite, où il y ot maint homme mort ; et, au retour de la chasse, ramenèrent bien de "quatre-vingts à cent prisonniers ; et, tout droit à leur proie vindrent, devant le connestable, qui tenoit son ordonnance et menoit grand joie de la victoire. Entre lesquels prisonniers estoit le seigneur d’Anières, messire Jehan de Garensières et plusieurs autres. Or est vrai qu’avecque les gens de?euerre tenans le parti des Orlienois estoient plusieurs paysans, dont en y ot de tués de trois à quatre cents. Après la victoire et la reddition du chastel de Saint-Remy, le connestable se retrait dedans la ville de Danfrons, et fist préparer et mettre ses gens en ordonnance pour de tous points assiégier le chastel. Ceux du chastel véans qu'ils auroient le siège, et que, entendu la bataille qui avoit esté donnée devers Sainct-Remy, il n’estoit point vraisemblable à avoir secours, rendirent la place, moyennant qu’ils se partiroient saufs en leur corps et biens. Après la conqueste de Danfrons et de Sainct- Remy au plain, le connestable et ses gents retournèrent à Paris. Lequel fut rechu à grand
joie et honneur, pour la victoire que Dieu lui avoit envoyé.
