CHAPITRE XXII

issus de Calais et d’autres forteresses, en tirant sur les frontières du Boullenois, et commencoient à courir et faire innumérables maux, en enfraignant les trèves qui estoient entre eulx. Et pour obvier aux entreprises du roy d’Angleterre, fut envoyé ès parties de Boullenois le comte Waleran de Saint-Pol, lors connestable de France, qui hastivement se partit du roy, avecque lui le Borgne de la Heuse ét autres chevaliers, et alla à Saint-Omer, à Boullogne et autres places sur les frontières; si les garnit et renforca de gens de guerre pour résister aux Anglois. Tantost après, toutes ces places ainsi pourvues, toute la terre et frontière des Anglois fut esmute et plaine de rigoeur et de rumeur; mais ils cessèrent pour adviser la manière des François. Toutefois gaires ne se tinrent sans mal faire, et commencèrent à courre, prendre prisonniers, et faire le pis que povoient. Le connestable, véant leur manière, tint conseil avec ses chevaliers et autres. Le conseil tenu, il assembla jusques au nombre de trois cents lances et six cents hommes archiers, lesquels conduisoient le seigneur de Louroy et un nommé Aliam Becquetin. Il envoya devers la ville de Guisnes, quand ils commencèrent à approcher, et tout à pied. De par un autre costé, estoit envoyé messire Jean de Remy avec quarante lances; car bien savoit les entrées de la ville, afin de montrer par quel lieu il debveroit assaillir. Laquelle ville estoit close de bons fossés, et sy estoit garnie d'Anglois, Hollandois et autres souldoyers qui y demeuroient. Le connestable, atout six cents lances, passa oultre la ville pour garder un passaige qui estoit entre Calais et Guisnes; lors le connestable se mit au milieu de ses gens, et là se tint tant que l’assaut dura. Les compaignies ordonnées pour che faire se trouvèrent ensemble au point du jour près de la ville, bien ordonnés et prests pour assaillir. Si commenchèrent à passer les fossés et rompre les palis; et firent tant par leur vaillance que ils entrèrent dedans la ville. Si y bouttèrent le feu, et y ot arses plus de quarante maisons. Mais ceulx du chasteau ouvrirent une porte de leur basse-cour, par laquelle ceulx de la ville entrérent dedans. Ainsi fut la ville prinse et arse, à laquelle y ot plusieurs morts et navrés. La retraite des François fit scavoir le seigneur de Louroy au connestable, lequel

atout son armée, retourna à Boullogne, où il laissa garnison, comme ès autres lieux et places. Les deux parties couroient tous les jours les uns sur les aultres, en faisant innumérables maux.