CHAPITRE XX VI

Guyenne. Le duc de Bourgongne, véant ainsi les choses retournées, se partist secrettement de Paris, en menant le roy à la chasse où il prit congé de lui et s’en alla en son pays de Flandres; dont ceulx de Paris et autres ses bienvoeullans furent moult desplaisans; car ceulx qui estoient commis en aucuns offices ou gouvernements furent despostés à la requeste des ducs de Berry et d’Orliens; mais toutefois il advint, avant le partement du duc de Bourgongne, maintes merveilleuses choses en la ville de Paris, ainsi que cy après sera dit. Ainsi comme vous avez ouy se demenoient les faicts de France, et tout par envies et haynes couvertes ; parquoi le roy et son royaume fut presque tout détruit, et si ne povoit mais. Or est vrai, et ainsi que pour les maux que le duc de Clarence faisoit au pays de Normandie, le roy fut conseillé de faire mandement et assembler gens d’armes pour résister allencontre de icellui duc de Clarence et de ses gens. Toutefois, comme vous avez ouy, le duc d’Orliens contenta le duc de Clarence, et tant fit que il retourna en Angleterre lui et ses gens.