CHAPITRE XXXVIII
es tn ENS ne me — mn ee ee
faire à leur souverain seigneur. Ceulx de la ville respondirent que très volontiers le recevroient luy et son aisné fils de Guyenne, avec leur estat, et non autrement; laquelle response feut faicte au roy qui autre chose n’en feit pour l'heure. Si feut le logis du roy ordonné en la maison d’ung bourgeois de Compiengne, séant entre la ville et la forest ; et le duc de Guyenne feut logé en l’abbaye de Royal-lieu, et les aultres princes tout a l’environ de la ville. Canons et bombardes feurent ajustés, qui dommagèrent la ville; plusieurs saillies et escarmouches se faisoient le siége durant. Entre les aultres en y eut ung dont il faut faire mention.
Vrai est que messire Hector, bastard de Bourbon , manda à ceulx de Compiengne que le premier jour de may les iroit esmayer ; laquelle chose il feit; et monta acheval,en sa compaignie deux cents hommes d’armes des plus vaillants qu’il pot finer, et avec une belle compaignie de gens de pied, et tous ensemble chacun un chapeau de mai sur leur harnois de festes, allèrent devant la porte de Compiengne nommée la porte de Pierrefons; et avec eulx portoient une grand” branche de may pour les esmayer, ainsy que promis l’avoient les chevalliers et escuyers avec eulx. Les aultres qui dedans la ville estoient, quy savoient ceste venue, s’estoient préparés, armés et ordonnés, et plusieurs montés en armes ouvrirent la porte et feirent une saillie sur le bastard de Bourbon et sur ses gens, en laquelle bataille y eut maintes belles armes faictes, dont plusieurs, tant d’un costé comme d’aultres, y feurent blessés et navrés, et sy en y eut de morts en la place. Et de faict, le bastard de Bourbon eut son cheval tué sous luy, et s’il n’eust eu bonne ayde, eust esté mené prisonnier dedans la ville ; toutefois il feut très bien secouru , et sans grand’ perte retourna en son logis, luy et les siens. Quand ceulx de la ville se veirent assiégés, et le roy devant eulx à sy grande puissance, ils conclurent d'envoyer devers le duc de Bourgongne, luy requérant se de luy auroient secours, ou quelle chose il luy plairoit qu'ils feissent. Le duc de Bourgongne, véant que le roy estoit en personne, et que il n’avoit point gens prests pour lever le siége, leur manda que ils feissent traité et apoinctement le plus honnorablement que faire se polroit. La response du duc de
Bourgongne venue à ceulx de Compiengne,
trouvèrent manière de parlementer à ceulx du siége ; et tant feut exploité, que la ville seroit
rendue au roy, par ainsy que tous les gens de |
guerre quy dedans estoient s’en iroient où bon leur sembleroit atout leurs biens, et généralement atout ce quy leur appartenoit,; quant aulx habitants de la ville, ils demoureroient en corps et en bien saufs, et sy auroient pardon, moyennant que ils crieroient merchy au roy.
Et par ainsy feut la ville de Compiengne rendue au roy, quy feut le septiesme jour du mois de may, l’an 1414. Icelle reddition faicte, et les Bourguignons vidiés, lesquels s’en allèrent au pays d’Arthois, le roy et le duc de Guyenne entrèrent dedans la ville, où ils feurent faisans bonne chière par aucun temps. Pendant ce temps, le comte Walleran de Saint-Pol chéy de son cheval sy rudement qu'il se rompist la jambe ; et pour icelle adventure ne se arma point en icelle armée; dont les aucuns dient qu'il faignoit estre blessé , afin de estre excusé d'aller au mandement du roy, et pareillement estoit requis du duc de Bourgongne que il l’allast servir, et ainsy par la blessure ou aultremeut ne servist ne lung ne l’aultre. Et pareillement messire Jacques de Chastillon, seigneur de Dampierre, admiral de France, se tint toute la saison en son chastel à Roulencourt, où on disoit que il estoit malade , et pour icelle armée ne servit le roy ne le duc de Bourgongne. Toutefois la pluspart de leurs gens feurent au service du duc de Bourgongne.
