CHAPITRE XXXIX

eust la teste tranchée; messire Pierre de Menau et plusieurs aultres ; et avec ce furent de cinq à six vingts, tant Anglois comme aultres, pendus. Après celle destruction, le roy fist diligemment chercher qu’estoient devenus les ossements des corps saincts, et avec ce fist crier que nul, de quelqu'’estat, ne les transportast hors de la ville ; par lequel moyen, aussi par argent qui en feut donné, furent plusieurs corps et saincts reliquaires remis ès églises, et avec ce plusieurs notables femmes, qui par nobles hommes avoient esté menées en la garde du duc de Guyenne, furent remenées en leurs maisons, et avec ce gens ordonnés des plus notables pour retraire le peuple de la ville, tant prisonniers que ceux qni s’en estoient fuis, auxquels le roy donna pardon, et par ainsi se retra yrent plusieurs de la cité. Après ces ordonnances faictes, le roy se partit dé la ville de Soissons, en prenant son chemin vers la cité de Laon, où il feut bien l’espace de quinze jours; et là alla devers lui Philippe, comte de Nevers, frère du duc de Bourgongne, lequel fist son traicté envers le roy, tel que le roy n'iroit ne envoyeroit en sa comté de Rethel, ne aussi en aultre terre et seigneurie que il eust ; laquelle chose le roy luy accorda, par ainsi qu'il ne aideroit ne conforteroit en quelque manière le duc de Bourgongne son frère; puis après ce traicté faict, s’en alla le comte de Nevers en sa ville de Mezière-sur-Meuse. Le roy estant à Laon fist publier nouveaux mandements pour avoir gens de guerre.

Le quinziesme jour de juin se partit le roy de Laon, et alla en sa ville de Sainct-Quentin; en laquelle ville alla devers luy la dame de Hainnault, sœur du duc de Bourgongne, pour traicter la paix; mais quelle remonstrance qu’elle sceuist faire, rien ne s’y poeult traicter ; et print congé du roy et s’en retourna. Le roy estant à Sainct-Quentin ouït nouvelles que les Bourguignons des duché et conté, en très belle compagnie, s’en alloient tout droict au pays de Haynnault, pour servir le duc de Bourgongne ; pour laquelle cause le duc de Bourbon, le comte d’Eu, et messire Charles de Labreth, furent ordonnés pour tirer sur les Bourguignons et les ruer jus ; et tant chevauchèrent qu’ils les trouvérent à un passage qui se nomme le Pont-à- Merle, au pays de Haynnault. Les Bourgui-

i gnons estoient en très belle compagnie.

Or est ainsi que les Bourguignons desjà avoient pasé le Pont-à-Merle, excepté le Veau de Bar qui conduisoit le charroi, qui se mist à deffense, et très vaillamment combattit; mais guères de gens n’avoit avec luy, et ses ennemis estoient bien quatre mille; si feut là prins et quarante ou cinquante avec luy, et les aultres se sauvèrent et prinrent leur chemin droict à Bruxelles, en Brabant. Or est vrai que le roy, après qu’il olt envoyé son avant-garde sur les Bourguignons, se partit de Sainct-Quentin en tirant après ces gens. et feut jusques à un gros village nommé la Chapelle, en Therrasse ; mais quand il sceut que son avant-garde retournoit avec leur prinse, retourna à Sainct- Quentin, et tantost après alla à Péronne, où il feut longue espace, et puis de tous poincts conclut d’aller assiéger Bappasmes et Arras. Mais, avant son partement, avoit esté le duc de Bourgongne en la ville de Péronne, et aussi les ambassadeurs des quatre membres du pays de Flandres, et ceulx quatre membres pour trouver la paix du duc de Bourgongne devers le roy. Quand le duc de Bourgongne sceut qu’il ne povoit avoir la paix, il conclut de se vouloir deffendre contre ses ennemis, toujours réservant la personne du roy et du duc de Guyenne, et de là en avant fist provision pour la garde de ses villes et forteresses de la comté d’Arthois et ailleurs.