CHAPITRE XLIV

Comment armes feurent faictes ès mines devant Arras, du comte d’Eu allencontre du scigneur de Montagu; et d’autres armes qui se feirent devant la ville de Lens; et les bonnes chières que les parties feirent les uns aulx aultres.

Après ces choses faictes se feirent plusieurs devises de ceux de la ville à ceux de dehors, et tous dirent que armes feurent prinses à faire dedans les mines, c’est assavoir de monseigneur le comte d’Eu allencontre de monseigneur de Montagu, capitaine de la cité; et feurent les armes conditionnées; c’est assavoir que le seigneur de Montagu devoit estre dedans

les mines armé et embastonné de hache, d’espée et de dague, se bon lui sembloit, et le comte d'Eu dehors les mines ainsi armé et embastonné comme l’autre ; et feurent les armes ainsi devisées : sy le seigneur de Montagu povoit issir hors les mines oultre la voulenté du comte d’Eu, estoit tenu de lui donner un diamant de cent escus, et au cas que le comte garderoit tellement l'issue que le seigneur de Montagu ne pourroit issir, ledit seigneur de Montagu seroit tenu de lui donner pareillement un diamant de cent escus. Ainsi que vous avez ouy feurent les armes faictes, mais le comte d’Eu, qui josne estoit, garda si vaillamment l'issue et le passage que le seigneur de Montagu ne le seut conquerre ; et de faict paya voulentiers le diamant qu’il feit présenter au comte d’Eu pour donner à sa dame. |

Durant iceluy siége avoit à Lens, en Arthois, garnison de vaillants chevaliers, escuyers et vaillants hommes. Or est vrai que les gens du roy alloient souvent courre devant la ville et chastel de Lens et au pays environ. Sy se prinrent, au deviser les ungs aux aultres, de rompre leurs lances, et tant que en pluiseurs devises se meit sus une entreprise de quatre nobles hommes Francois contre quatre nobles hommes Bourguignons ; èsquelles armes chascun devoit estre armé comme bon luy sembloit,ettels lances et fer que chascun vouldroit porter, mais qu’ils feussent de mesure. Or vous avez ouy comment le bastard de Bourbon, josne enfant, pour ce que le duc de Bourbon désiroit lui bailler bruit et cognoissance, le feit chef des quatre Francois ; et de la partie des Bourguignons feut capitaine un très puissant et bel chevalier nommé Cotte-Brune, qui depuis feut maréchal de Bourgongne, et en sa compagnie trois nobles hommes natifs du royaume de Portugal, lesquels estoient serviteurs du duc de Bourgongne. Et se feit l’assemblée à plains champs, entre Arras et la ville de Lens; et le jour de l’assemblée feut le hastard de Bourbon bien accompaigné de chevaliers et d’escuyers, lesquels avoient seureté et sauf-conduit du duc de Bourgongne; et pareillement l’avoient les Bourguignons du roy. À l’assembler s’entrefeirent grands festes tous, excepté ceulx quy les armes faisoient, qui ne parlèrent les uns aux aultres jusques aux armes faictes. Cotte-Brune, qui grand et puissant estoit, avoit fait apporter grosses lances à