CHAPITRE XLVIII
Du concile quy se tint à Constance, où le cardinal de Colonne feut esleu pappe et se nomma Martin; et comment le comte Waleran de Saint-Pol assegia la forteresse de Neufville-sur- Meuse, quy luy feut rendue.
Enicelle année se tint le concile à Constance, en Allemagne, de pluiseurs cardinaux, évesques et archevesques, et patriarches ; et aussi y furent pluiseurs ambassadeurs de roys et princes chrestiens. Et estoit lors très grande division en l’église, par Pierre de la Lune, nommé pape Bénédic , qui se disoit vray pape, nonobstant substraction qui luy estoit faicte, pour plusieurs causes, de la plus grande partie de la chrestienté ; et ne avoit mais obéissance que en Espagne et en Arragon, auquel royaume d’Arragon il se tenoit en une forte ville sur la mer. Et aussi en icel an avoit esté prins et mené en prison en la duché de Bavière le cardinal de Boulogne, nommé le pape Jehan; et le print le roy des Romains, empereur d'Allemagne, " pour pluiseurs crimes et articles que on luy mettoit sus. Et pour mettre l'Eglise en bonne paix et union, fist tant le roy des Romains que le concile fust mis audit lieu de Constance ; en laquelle ville le concile se tint continuellement par l’espace de deux à trois ans, avant que ceulx des royaumes d’Espagne et d’Arragon y vinssent ; lesquels y vinrent en l’an 1417, au mois d’aoust, à très belle et noble compagnie de prélats et de chevaliers ; et tant que après leur venue on procéda à vraye eslection de pape ; et enfin feut eslu, confirmé et pontifié le Cardinal de la Colonne, de la nation de Rome, en l'an 1417; et feut nommé pape Martin.
MÉMOIRES DE SAINT-REMY
Le comte de Sainct-Pol, soi disant encore connestable de France, se partit de la comté de Sainct-Pol, atout environ six cents combattants, hommes d’armes et archiers, desquels avoit bien soixante Anglois, et s’en alla par sa ville de Bohaim à Laon; auquel lieu lui furent fermées les portes, dont il feut mal content ; et se logea au-dessus d'’icelle ville, et puis de là à Rheims, à Chaslons et à Ligny en Barrois. Et tantost après le suivist la comtesse sa femme, sœur au duc de Barre, lesquels tous ensemble solennisèrent la feste de tous les Saincts en la ville de Ligny; et s’en alla à Luxembourg, à Thionville et en aucunes bonnes villes de la duché de Luxembourg, de laquelle duché il estoit gouverneur, et de la comté de Ligny, à cause de la comtesse sa femme. Et après qu’il eut visité les bonnes villes et forteresses audict pays, se prépara, environ la Sainct-Andrieu, pour asségier la forteresse de Neufville-sur- Meuse, en laquelle estoient aucuns de par le seigneur d’'Orchimont, qui continuellement couroient et faisoient guerre en la duché de Luxembourg et comté de Ligny. Et furent asségiés par le comte de Sainct-Pol, lequel avoit en sa compaignie de nobles gens de guerre, c'est assavoir, messire Collart de Fiennes, Gaviot de Bournonville, Allain de Wandonne, et pluiseurs aultres. La place fut fort battue de bombardes et de canons, et la basse-court prinse d’assault, et en feirent leur vouloir; et après bien trois mois que le siége y eust esté, la place se rendist. Après laquelle rendition le comte de Sainct- Pol s’en alla à Rheïims, où il fut grand espace de temps sans luy partir, si n’estoit pour aller esbattre aux champs.
En icelle saison, le duc de Guyenne se partit de Paris pour aller à Melun, à Montargis et à Bourges, et feut loger au palais du duc de Berry, et n’avoit à son partement de Paris que huit personnes avecques luy; mais les comtes de Vertu et de Richemont le scurent, si le suivirent et l’accompagnèrent tout le voyage ; et le lendemain se partit sans le scu de ceulx de Bourges, et s’en alla au chastel de Mehun-sur- Yevre, que luy avoit donné le duc de Berry après sa mort; et feut la cause pourquoi il alla en Berry. Le chastel luy pleust très bien, et en icelui y demoura un mois; après retourna à Paris. En ce mesme temps le comte de Warwick, trois évesques et trois abbés, et pluiseurs
notables chevaliers et clercs, docteurs en théologie et en décret, jusques au nombre de huit cents, descendirent à Calais, et par Flandres allèrent au concile de Constance, de par le roy d'Angleterre et de son royaulme, en moult noble appareil ; lesquels furent joyeusement receus du pape et concile, et du nouvel roy d’Allemagne et de Hongrie.
