CHAPITRE LIV

Cominent le roy d'Angleterre feit esquiper une armée de mer

pour passer en France; de l'ambassade envoyée au roy d'Angleterre ; des offres qu'ils lui feirent ; et de la response du roy d'Angleterre.

Les ambassadeurs du roy d'Angleterre, qui moult honorablement avoient esté festoyés en France, retournèrent devers leur souverain seigneur, qu'ils trouvèrent auprès de Londres, auquel ils firent leur relation de ce qu’ils avoient trouvé devers le roy : de laquelle response le roy d'Angleterre ne fut pas content. Pour laquelle cause fit assembler son grand conseil, pour avoir avis à trouver navires, et aussi pour préparer tout ce qu’il lui falloit pour passer en France pour recouvrer son royaulme, si faire se pouvoit. Pour avoir des navires, envoya ses députés en Hollande et Zélande, auquel pays trouva navires, par ainsi que ceulx à qui c’estoit feussent bien assurés du payement. Le roy d'Angleterre trouva manière de lever grand argent en son royaulme; et veut-on dire que sa finance montoit à six cents mille nobles, ou le moins, à la valeur. Sa finance faicte, se conclud et délibera de passer en France, atout la plus grand” puissance que bonnement pourroit finer ; lesquelles nouvelles feurent en brief temps sceues à Paris. Pour laquelle cause , le duc de Guyenne , qui avoit prins le gouvernement du royaume, fit assembler le conseil; et pource que lors il estoit assez esseullé des princes du sang royal, il remanda le duc de Berry, son oncle, et pluiseurs aultres, avec lesquels il tint plusieurs conseils , pour savoir qu’il avoit à faire pour la défense du royaulme, allencontre des Anglois. Si fut de prime face avisé que on mettroit une taille sur tout le royaume; et, avec ce, fut appointé que on enverroit une ambassade, pour essayer à rompre l’armée du roy d'Angleterre , si faire se povoit, tant par traictié et offres comme autrement, en faisant response aux demandes que avoient fait les ambassadeurs

du roy d'Angleterre, qui n’a gaires avoient esté ,