CHAPITRE LVIIL

roy d'Angleterre et tout son ost estoient en grande disette de pain ; et fut composé ledit village à huit corbeillées de pain, portées chacune par deux hommes, lesquelles par le capitaine de ladite forteresse furent présentées au roy d'Angleterre. Le roy d'Angleterre avoit deux gentilshommes de sa compaignie moult malades, lesquelles il bailla audit capitaine ; et devoit payer pour leur rancon pour chacun une haquenée ; et si bien se gouverna ledit capitaine envers le roy d’Angleterre qu’il en vallut depuis de mieux au desloger de Boves.

Le roy d'Angleterre, avecques lui son armée, prit son chemin vers Neelle en Vermandois ; et quand le roy passa devant icelle ville de Neelle, ils avoient leurs murs couverts de couvertoirs, la plupart vermaulx. Alors que le roy d’Angleterre alloit ainsi costiant la rivière de Somme pour trouver passage, estoit à Abbeville messire Charles de Labreth, connestable de France, avecques plusieurs autres notables chevaliers et autres gens de guerre, lesquels, oyants de jour en jour les nouvelles du chemin que tenoit le roy d'Angleterre, se partirent de la ville et allèrent à Corbie et de là Péronne, toujours leurs gens sur le pays assez près d'eux, et contestants garder tous les passages.

Et pour parler du passage du roy d'Angleterre, vrai est que lui et toute sa puissance descendirent des chevaux, et vinrent sur la rivière, et commencèrent à abattre maisons; et prirent eschelles, huis et fenestres, et feirent ponts pour passer; car, depuis environ huitheuresdu matin jusques à peu près de jour failli, ne cessèrent lesdits Anglois de besogner audit passage faire; et passoient sans chevaux. Quand ils furent passés en nombre compétent, passèrent un étendard ; et quand l'avant-garde fut toute passée et tout à pied, on fit passer les chevaux. Après passa la bataille et l’arrière-garde ; et comme il est dit ci-dessus, il fut nuit avant que tous fussent passés. Tout ainsi qu'il estoit nuit, Anglois marchèrent en pays ; et alla le roy d'Angleterre loger assez près d’Athie, et les François estoient au pays d'environ. Et quand les François furent avertis que les Anglois avoient passé la rivière, ils furent moult mal contents de ceux de Sainet-Quentin, car par le roy leur estoit enjoint de rompre le passage par ou ils passèrent.