CHAPITRE LXXX V

Paris; et en briefs jours après, y vint grand nombre de gens de Picardie et ailleurs. Le matin après la prise de Paris, le maréchal de Rieux, le seigneur de Barbasan et Tanneguy du Chastel, accompagnés de quinze cents combattants, entrèrent dedans Paris à estendard déployé, par la porte Sainct-Anthoine, et s’en allérent par derrière à l’hostel de Sainct-Pol, cuidants trouver le roy pour l'emmener avec eux ; mais ne le trouvèrent pas, car on l’avoit mis au Louvre atout son estat. Si chevaucherent en icelle grand rue, criant :« Vivele roy et le connestable comte d’Erminacq ! » Mais ceulx de Paris, tout incontinent, avec leur nouveau prévost et le seigneur de l’Isle-Adam , s’encoururent celle part à si grand effort qu’il convint les Erminacqs retraire en la bastille; et y perdirent jusques au nombre de trois ou quatre cents des plus aventureux de leurs gens; et des Parisiens feurent occis environ quarante hommes. Et tantost après iceux, le maréchal de Rieux, le seigneur de Barbasan et Tanneguy, laissèrent bonne garnison dedans la bastille, et s’en allèrent à Corbeil, à Melun et à Meaux.

Et d’autrepart, le jeudy ensuivant, vinrent à Paris Hector et Philippe de Saveuse à deux cents combattants, et se logèrent du costé de la bastille, aux Tournelles et là entour; et puis le vendredy, le samedy et les jours ensuivants, vinrent à Paris messire Jehan de Luxembourg, le seigneur de Fosseux et aultres, à grand’compaignie.

Ceulx quy feurent occis du party du comte d’Erminacq feurent par le bourrel de Paris portés aux champs et là enfouis; les aultres de Paris feurent enterrés honorablement en terre saincte.

Après ces choses faictes, ceulx quy feurent demourés en ladite bastille traitèrent avec le seigneur de l’isle-Adam ; et s’en allèrent saufs leurs corps et leurs biens : et feut commis à ladite bastille le seigneur de Chauny, quy grand temps avoit esté prisonnier là dedans et depuis qu’il retourna d'Amiens faire

| l'ambassade au duc de Bourgongne, dont Cy-

dessus est touché.