CHAPITRE XCL

villes et chasteaux, comme dit est. Et durant ces grands divisions qui estoient en France, entre les Franchois et les Bourguignons, et après qu’il eut pris pluiseurs villes et chasteaux, il alla mettre son siége devant la bonne ville de Caen, qui estoit moult puissante en bon peuple; et la fit assaillir par divers assauts, où moult perdit de gens ; mais enfin tant continua que ladite ville, par force et d’assault, fut prinse ; et fut bien mort six cents des deffendants. Et depuis se tint le chastel environ trois semaines ; mais enfin se rendit moyennant que le capitaine et ses gens eurent seureté du roy d'Angleterre d’eulx partir, saufs leurs corps et biens. Après laquelle conqueste le roy d’Angleterre fit asségier par son frère, le duc de Glocestre, la forte ville et chastel de Cherbourg, qui estoit la plus forte place de toutte la duché de Normandie, et des mieux pourvues de vivres et de habillements de guerre ; et y fut le siége environ dix mois, que oncques ne furent secourus. En la fin, messire Jehan d’Angiennes, qui en estoit capitaine, le rendit au duc de Glocestre, pour et au nom du roy d'Angleterre, moyennant qu’il en eut certaine somme d'argent, et sauf-conduit pour aller où bon lui sembla. Et s’en alla depuis en la cite de Rouen, après ce qu’elle fut conquise du roy d’Angleterre. La séjourna tant que sondit sauf -conduit fust passé, sur la fiance d’aucuns seigneurs Anglois qui lui donnoient à entendre qu'ils lui feroient rallonger. Mais il fut trompé ; et lui fit le roy d'Angleterre, trancher la teste, pour ce qu’il avoit pris argent de la rendition de la place, laquelle estoit encore assez bien garnie de vivres et artillerie; dont aucuns Franchois feurent bien joyeux, pour ce qu’il avoit rendu la place par convoitise d’argent, au préjudice du roy.