CHAPITRE XCVII

advenu, les gens du daulphin prirent le corps du duc de Bourgongne; si le desvestirent et ne luy laissèrent que son pourpoint, les housseaux et la barrette en son chef, et le mirent en un moulin quy là au plus près estoit, où il feut toute la nuict ; et lendemain matin feut mis en terre en l’église Nostre-Dame, devant l’autel Sainct-Loys, en ce mesme estat où il estoit; et feirent dire aulcunes messes. Charles, fils du duc de Bourbon, demoura avec le daulphin, et aussy feit messire Pierre de Giac, la dame de Giac et Philippe Josequin, et luy feirent le serment ; mais les autres ne le voulurent oncques faire, pour bien ny pour promesses que on leur feit, disans toujours que mieux aimeroient mourir que faire chose qui tournast à reproche à eux et à leurs hoirs; et finablement ils feurent tous mis à finance, sinon messire Charles de Lens, amiral de France, qu’ils firent mourir. Et, à ceste heure, pluiseurs hommes nottables estoient avec le daulphin, qui rien ne scavoient du secret de ceste matière; et en y eut d’aulcuns auxquels il desplut grandement, considérans les tribulations, ou reproches, ou meschefs qui en polroient sourdre au temps advenir, tant au royaulme de France comme à la personne de leur seigneur et maistre, le daulphin. Après ce que le daulphin eust tenu pluiseurs consaulx sur ses affaires, soi excusant de non avoir rompu la paix, fit rescripre pluiseurs lettres à ceulx des bonnes villes tenans son party, et en pluiseurs aultres lieulx : mais quelque rescription que il fist, ne fut pas cru; car tous ceulx qui en oyoient parler, et que sous ombre de bonne paix avoit esté faict tel murdret, en estoient desplaisans, car il estoit moult aymé en France. Le daulphin se partit de Montereau, et s’en alla à Bourges, et manda gens d’armes de touttes parts ; et de là s’en alla en Anjou, où il eut parlement avec le duc de Bretaigne. Et lui accorda le duc une partie des nobles hommes de son pays pour lui servir : et adonc lui vindrent une moult grand’ compaignie d’Escochois qu'il envoya sur la rivière de Loire; puis s’en alla en Poitou, en Auvergne et en Languedoc, pour y lever gens d'armes, et y avoir leur aide. Et par touttes les bonnes villes où il passoit, il faisoit prononcer que ce qu'il avoit faict contre le duc de Bourgongne avoit esté faict sur bonne

(4) Meurtre.

et juste querelle, en soy justifiant le plus qu'il povoit. Quand la chose vint à la cognoissance des Parisiens, ils en furent mouls dollens!; ct pourt ant, lendemain, au plus matin qu'ils peurent, assemblèrent le comte de Sainct-Pol, nepveu du duc, lieutenant du roy à Paris, le chancellier de France, les prévosts de Paris et des marchands, et généralement tous les officiers du roy. En laquelle assemblée fut remonsiré la mort du duc, et la manière comment icelle avoit esté faicte. Pour laquelle cause les dessus nommés firent serment au comte de Sainet-Pol de le servir, obéir, et, de toutte leur puissance, entendre à la garde et défense de la bonne ville de Paris, et de résister de corps et de biens à la dampnable intention des crimincux, séditieux, rompeurs de paix et union du royaulme, et de poursuivre de tout leur pouvoir la vengeance des coupables et consentans de la mort et homicide du duc de Bourgongne; et firent serment d'entretenir leurs promesses; et, de ce, baillèrent lettres scellées du scel de Paris; et pareillement firent les aultres bonnes villes de France qui alors tenoient le parti du roy et du duc de Bourgongne.