CHAPITRE CIX

empescheur de tous biens, ne le poeult souffrir, comme vous oyrez cy après. Vray est que, durant le temps que le duc de Bourgongne et ses gens pratiquoient icelle réconciliation , le seigneur de Robertsart, Haynuyer, de tout temps tenant le parti des Anglois, et aussy faisoient deulx de ses frères et ses enfants, et la plupart de son lignage, s’estoit party d'Angleterre et se trouva en la ville de Valenciennes, où lesdites dames estoient; et là feut pratiqué le mariage du duc de Glocestre et de la duchesse de Brabant, nonobstant qu'elle feust mariée au duc de Brabant, comme dictest. Et tant y feut besogné, que la duchesse de Brabant laissa icelle belle assemblée quy se faisoit à Bruxelles; et, de fait, s’accorda, du consentement de sa mère, de s’en aller avecques le seigneur de Robertsart en Angleterre, feignant que elle vouloit aller en Ponthieu, dont elle estoit dame douairière, à cause du daulphin que elle avoit espousé. Si se partit la duchesse de Brabant de Valenciennes, prenant congé de sa mère ; et s’en alla au giste de Bouchain, où icelle nuict elle ordonna ceulx et celles que elle vouloit avoir pour mener avecques elle. Et n’est mie à doubter que elle et le seigneur de Robertsart avoient ordonné l'heure que elle devoit partir de ladite ville de Bouchain. Comme vous avez ouy, la duchesse coucha une nuict à Bouchain , et, lendemain devant le jour, elle feut à cheval, elle cinquiesme de femme, et ung petit nombre de gens; mais elle ne feut gaire éloignée de Bouchain, que elle trouva le seigneur de Robertsart, en sa compaignie environ quarante chevaulx, dont la plupart estoient archiers. En che point alla la duchesse de Brabant cn Angleterre ; dont en advint depuis de grants guerres et aultres maulx ès pays de Haynault, de Hollande et Zélande, dont elle estoit héritière, comme cy après sera dict.