CHAPITRE CXIII
Ces choses faictes, le roy d'Angleterre assembla grant puissance de gens, pour aller mettre le siége devant la ville de Meaux en Brie, assise sur la rivière de Marne, et ordonna le duc d'Exestre, son oncle, atout quatre mille combattants, et l’'envoya prendre les faubourgs de ladicte ville de Meaux en Brie, afin que ceulx qui dedans la ville estoient n’y bouttassent le feu. Et tantost après que le roy eust appresté touttes ses besognes, il se partist à toutte sa puissance, nombrée à vingt mille combattants ; et, le sixiesme jour d'octobre, se logea tout à l’environ de la ville et marché de Meaux ; et, en briefs: jours fit fermer son ost de hayes et de fossés, afin que de ses ennemis ne fust surpris, ne aussi que ceulx de dedans Ia ville ne pussent issir. Le roy d'Angleterre fit dresser canons et engins pour battre portes et murailles, et, avecques ce, fit faire de belles approches ; et belle chose estoit à voir le siége. De par le daulphin estoient dedans la ville le bastard de Vaurus, son frère, Pierron de Luppe, messire Philippe Mallet, messire Loys Gast, et le Borgne de Coussy, jusques à mille combattants, vaillants hommes et esprouvés en armes, sans les bourgeois et communauté de la ville. Maintes belles saillies furent faictes devant le siége, qui assez longuement dura, comme vous orrez. Pendant iceluy siége, fut ordonné, à Paris, par le conseil du roy , que la monnoye, nommée flourettes, qui, de seize deniers, avoit esté mise à quatre deniers, seroit de rechief diminuée et mise à deux deniers, et l’escu d’or, qui avoit couru à neuf francs, fust mis à dix-huit sols parisis. Pour lesquelles mutations de monnoyes furent pluiseurs gens fort troublés ; et, pour avoir provision d'autre monnoye nouvelle qui fust de valeur, furent forgiés salus d'or, qui eurent cours pour vingt-cinq sols tournois la pièce. En icelle monnoie, avoit deulx escus de France et un d'Angleterre. Et, au regard de la blanche monnoye, on forgea doubles, qui eurent cours pour deux deniers tournois ; et depuis furent nommés nicques ; et régnèrent environ trois ans seulement. Je lairai à parler des choses dessusdictes, et parlerai d’une rencontre qui fust faicte entre messire Jacques de Harcourt, et aulcuns Anglois. En ce inesme temps, messire Jacques de Harcourt, capitaine du Crotoy, chevauchoit parmi le pays de Vimeu, en la compaignie de six à sept cents
combattants. Il fust rencontré d’Anglois qui
d'aventure s’estoient ressembles des villes de :
Neufchastel, d'Argies et d’aultres lieulx, pour aller querre leurs adventures sur leurs ennemis; auxquels il eust très aspre rencontre ; et vaillammentsecombattoient ces deulx parties. Mais, en conclusion, les Anglois obtinrent la victoire; et perdist ledict messire Jacques de Harcourt de trois à quatre cents de ses hommes, tant morts que prins. Après ceste besogne, les Anglois, très joveux de leur bonne fortune, retournèrent en leurs propres lieulx, et si emmenèrent avec culx grand’ planté de prisonniers, qui depuis furent délivrés par grands raenchons et finances, comme en tel cas il est accoutumé à faire.
