CHAPITRE CXIV
Comment le duc partist de Flandres pour aller en son pays de Bourgongne, en passant par Paris au bois de Vincennes, ou estoient le roy et la royne, et de là au siège de Meaux, et comment il alla visiter de duc ct la duchesse de Savoye, son bet oncle et sa tante; et comment le comte de Conversan fut délivré de prison; el aussi fut Arthus, comte de Richemont, frère au duc de Bretaigne.
En ce temps mesme, après la feste de la Nativité de nostre Seigneur, le duc se partist de la ville d'Arras, où il laissa la duchesse, sa femme, fille du roy. Là prinrent congié l’ung de l'aultre, mais oncques depuis ne se virent, car ellé mourut en brief temps après le partement de son mari; et s’en partist le duc, en sa compaignie le comte de Sainct-Pol et pluiseurs aultres. Il chevaucha , et tant exploita qu’il se trouva en la ville de Paris ; puis alla vers le roy et la royne, qui au bois de Vincennes estoient. Le duc ne séjourna gaires à Paris, et s'en alla devers le roy d'Angleterre , qui tenoit le siège devant Meaux, ainsi que devant est dict. Le roy d’Angleterre le receut moult honorablement , et moult joyeux fust de sa venue; et là tindrent grands consaulx ensemble, pour les affaires du royaulme. Le duc ne séjourna gaires avec le roy d'Angleterre, et s’en alla en son pays de Bourgongne, où il n’avoit point esté depuis la mort de son feu père, voir la duchesse sa mère et ses sœurs, desquelles il fust receu à grand’ liesse. Ses hommes el vassaux lui firent les serments accoutumés de faire. Le duc fust fort festoyé de ses subjects, de joustes et esbattements pluiseurs à sa venue. Après sen alla Je duc en pays de Savoye, voir son bel oncle
et sa tante, les duc et duchesse de Savoye, et ce fait retourna en Bourgongne. Or est vray que durant le temps que le roy d'Angleterre tenoit son siége devant la ville de Meaux, vinst devers lui, à privée maisgnie !, messire Jehan de Luxembourg, pour traictier de la délivrance du comte de Conversan , son frère, lequel, jà par long temps, avoit esté prisonnnier, et encore estoit dedans icelle ville de Luppes; et, lui venu là, fist et traicta tant, par l’aide et moyen du roy d'Angleterre, que son frère fust délivré de prison, moyennant certaine grant somme de pécune qui fust promise à payer et délivrer à Pierron de Luppes, à jour assigné. Et, depuis sa délivrance, demoura iceluy comte au service du roy d'Angleterre durant le siége de Meaux, et messire Jehan de Luxembourg retourna en Picardie, dont il estoit capitaine général, et en sa compaignie messire Hue de Lannoy, qui nouvellement avoit esté constitué maistre des arbalestriers de France, de par les deulx roys de France et d'Angleterre. Auquel an la royne d'Angleterre accoucha en Angleterre d’un fils, qui, par l'ordonnance de son père, fut nommé Henry sur les fonts, et avec les aultres qui à ce commis estoient, le leva la duchesse de Brabant, qui alors estoit en Angleterre. Pour laquelle nativité duquel fils fut menée très grand’ liesse en Angleterre.
En ceste mesme année et saison, par Certain traictié, fust délivré des prisons du roy d’Angleterre Arthus, comte de Richemont , frère au duc de Bretaigne ; et, après sa délivrance, alla atout gens d'armes au siege de Meaux, servir le roy d'Angleterre; auquel service il demoura la vie d'iceluy roy d'Angleterre.
