CHAPITRE CXVII

Comment la royne d'Angleterre arriva à Harfleur, et de là s'en alla au bois de Vincennes, vers le roy el royne, sCs père et mère, où le roy d'Angleterre vint vers elle; comment les dits roy et royne tirérent à Paris et à Senlis; de la fcinme de l'armoyeur du roy quy fut exécutée avec aucuns de ses complices.

En l’an 1422, le jour de may, la royne d’Angleterre arriva à Harfleur en noble appareil et grant compaignie de gens d’armes, et avecques elle le duc de Bethfort, son beau-frère, quy estoit chef de l’armée. Et, après qu'ils eurent pris terre, allèrent à Rouen, et de là au bois de Vincennes devers le roy son père et la royne sa mère. Le roy d'Angleterre, son mary, qui estoit à Meaux avecques ses princes, adverti de sa venue, se partit et alla au bois de Vincennes devers le roy et la royne sa femme, où il fust moult honorablement receu ; et le pénultiesme jour de may, les deux roys de France et d’Angleterre, et les roynes, se partirent de là, et entrèrent à Paris en moult noble estat. Et feurent logés le roy et la royne en leur hostel de Sainct-Pol , et le roy d'Angleterre et sa compaignie feurent logés au chastel du Louvre; et là célébrérent, chascun en son hostel, la feste de Pentecoste. Après les festes passées, le roy d'Angleterre fist en icelle ville de Paris cueillir et lever la taille de marcs d'argent pour forger la nouvelle monnoye, ainsy et par la manière que on l’avoit cueillie ailleurs. Si s’en esmurent pluiseurs rumeurs ; mais finablement les Parisiens, pour la crémeur du roy d'Angleterre, ne osoient montrer semblant de nulle désobéissance ou rébellion. Après un petit de temps, les deux roys et les roynes allèrent à Senlis, où ils séjournèrent aulcuns jours. Ne demoura gaires après que le roy d'Angleterre envoya son frère le duc de Bethfort à Compiengne, pour icelle recevoir du seigneur de Gamaches; lequel, comme paravant est dict, avoit promis