CHAPITRE CXX

Du trespas de la duchesse de Bourgongne,' madame Michelle de france, en la ville de Gand, et du trespas du roy Charles de France, Vie de ce nom, nommé le Bien-Aimé, en la ville de Paris.

En ce temps que les assemblées se feirent pour le voyage de Cosne, mourut en la ville de Gand madame Michelle, fille du roy et femme du duc, et sœur au daulphin. Pour laquelle mort feurent troublés tous ses serviteurs, et généralement ceulx de Gand, et tous ceulx du pays du duc. Et assez tost après s’accoucha en son hostel de Sainct-Pol, à Paris, le roy ; et le vingt-uniesme jour d'octobre, rendit son esprit à Dieu; et feurent à son trespas tant seulement son chancellier, son premier chambellan , son confesseur et aumosnier, avec aulcuns de ses officiers et serviteurs, en petit nombre. Puis fut son corps apporté à Sainct-Denis. Et n’y avoit lors nul des princes de son sang, excepté le duc de Bethford, frère au roy d'Angleterre défunct ; et mis en sépulture avec les aultres roys ses prédécesseurs. Après lequel enterrement et service accomplis, s’en retournèrent à Paris tous ceulx qui accompagné l’avoient.