CHAPITRE CLXIW
Du pardou que le duc fcit aux Cassellois pour leur rébellion ; et cumment il en fist exéculer, et remit le pays en justice.
Le quatriesme jour de janvier dessusdit, se partit le duc de Brouxelles et s’en alla à Sainct- Omer, pour résister allencontre de ceulx de Cassel, quy s’estoient rebellés à ses officiers ; et là assembla une belle et grand” armée. Et quand le duc et ses seigneurs et ses gens furent prests pour rentrer audit pays de Cassel, ils envoyèrent devers le duc, en luy priant qu’il les voulsist prendre à merchi; sy les rechupt, par ainsi qu'il les auroit à sa voullenté sans rien réserver, et que tous les hommes dudit pays de Cassel, au-dessus de quinze ans et au-dessous de quarante, venroient hors de leur pays, la teste nue, deschaulx et nus pieds, et les gens d’église revestus atout croix et bannières, et eau bénoiste ; et avecques ce porteroient tous leurs habillements de guerre en quelque lieu queil plairoit au duc. Si fust ainsy faict; et se rendirent ainsy que dessus est dict, et issirent hors de
leur pays ; et vindrent en une place à une lieue près de Sainct-Omer, en tel estat que dessus est dict, nommée ladite place le Noeuf-Fossé. Si fist ce jour si très horrible temps de vent et de pluye qu'il n'estoit quy peust durer aulx champs; et en iceluy jour eult en la ville de Sainct-Omer maintes églises et maisons découvertes du très horrible temps qu'il faisoit. Et quand les dessusdicts de Cassel furent arrivés en ladiete place, sy se mirent en belle bataille, les gens d'église, comme dict est, revestus, et tous les testes nues, deschaux et nuds pieds, nombrés environ trente mille hommes. Et quand le duc sceult leur venue, il alla vers eulx atout son armée ; et tantost qu’ils le perchurent il se mirent à genoulx. Si passoient les gros ruisseaulx d’eaue parmi eulx de la pluye, tellement que c'estoit grand’ pitié à veoir ; et lors vint le prévost de l’église de Sainet-Omer et Andrieu de Toulonjon, de par madame la duchesse, quy se mirent à genoulx en l’eaue et la boe devant le duc, en luy priant, de par madame la duchesse, qu’il luy pleust pardonner le meffaict aux dessusdits Casselois. Si les receupt à merchy et leur pardonna leur mesfaict, réservé à six quy eulrent les testes coppées en la ville de Cassel. Apres touttes ces choses, donna le duc congié à tous ses gens d'armes, et s’en alla en ladicte ville de Cassel, la où il fist morir par justice les six hommes dessusdicts. Lequel pays avoit esté bien deulx ans ou environ en dissention et guerre sans justice. Et ces choses faictes, s’en alla le duc en sa bonne ville d’Yppre en Flandres, en laquelle ville il ne séjourna gaires, qu’il s’en retourna à Brouxelles en Brabant , là où il avoit laissié madame la duchesse.
