CHAPITRE CLXX VI
messire Jehan de Croy, comme chiefs de l’ost, iroïent tenir la place pour le duc devant Passy; et meneroient et conduiroient la noble armée du duc; et il demourroit audict Ravières, accompaignié de sa noblesse; et ainsy fut faict, Et la cause pourquoy Le duc n’alla point au lieu où la journée se debvoit tenir fut, pour ce que les adversaires ne se comparurent point à puissance à ladicte journée , comme après sera dict. Or est vray que le seigneur de Charny et messire Jehan de Croy tindrent la journée, comme dessus est dict , à laquelle nul ne s’apparut pour combattre ; dont ladicte ville et chastel de Passy se rendirent comme leur traictié le portoit ; et en prinrent lesdicts seigneurs la possession; et pareillement se rendirent touttes les villes et forteresses dont ci-devant est faict mencion. Si furent les hostages renvoyés et délivrés, comme raison estoit. Apprès ceste journée ainsy tenue par le duc et les choses des. sus faictes et passées, il donna congié à la plus grant partie des gens quy là estoient venus à son mandement ; et se retournèrent le seigneur de Tallebot, Anglois, le seigneur de l’Isle-Adam, et pluiseurs aultres, à Paris et ailleurs, dont ils estoient partis ; et les remerchia le due moult honorablement, en faisant de moult nobles et riches dons. Et aussy pluiseurs seigneurs de Bourgongne s’en retournèrent en leurs lieux et maisons. Le due print son chemin à Noyers: et là ordonna, par bonne délibéracion de conseil, qu'il envoieroit mettre le siége devant une forte ville nommée Chamblires, Ià où estoient ses ennemis à grant puissance : et furent chiefs d’icelle armée le seigneur de Charny et messire Jehan de Croy; et y furent par l’espace de six jours ou environ, que iceulx furent si constraints par force d'armes que ils se rendirent, saulfs corps et biens. Or fault parler de cinq chevalliers, quy tous furent en leur temps frères et compaignons de la noble ordre de la Thoisond'Or; c’est assavoir messire Jehan et messire Anthoine de Vergy, le seigneur de Neufchastel, le seigneur de Crequy et le seigneur de Montagu, avecques eulx le comte de Fribourg, qui par le duc furent envoyés pour lever le siége que tenoient le damoiseau de Commersi et le seigneur de Chasteau-Villain, et aultres devant Bourg; et fut le partement le vingt-huitiesme jour d’aoust, an dessusdict. Or est ainsi que, quand lesdicts de Chasteau-Villain et de Com-
mersi sceurent la venue desdicts seigneurs, et qu’ils venoient sur eulx à puissance , ils levèrent leur siége et se retrairent dedans la cité de Lengres. Quand les seigneurs dessusdicts sceurent leur partement et là où ils estoient retraits, ils se meirent apprès eulx en chemin, et s’en allèrent devant ladicte cité de Lengres, là où ils furent depuis dix heures au matin jusqu’à sept heures aux vespres ; et là v eult de grants armes et escarmouches faictes. Apprès partirent iceulx seigneurs de là, et allèrent mettre le siége devant une forte place nommée Cavenchy, là où il y avoit dedans environ soixante combattants, lesquels se rendirent, saulfs corps et biens. Si fut conclu par lesdicts seigneurs de abattre ladicte place, laquelle appartenoit au seigneur de Chasteau-Villain ; et fut abattue et toutte démolie. Apprès, envoyèrent iceulx seigneurs sommer une aultre place nommée Villers, apartenant pareillement au seigneur de Chasteau - Villain, lesquels se rendirent, et mirent les gens en la main du duc. Apprès touttes icelles choses faictes, se retournèrent iceulx seigneurs tous en leurs hosteulx , réservé le seigneur de Crequy, quy s’en vint logier à Jumeaulx , ung gros village , à trois lieues près de Dijon, et y mena ses gens, pour ce qu’il avoit eu nouvelles que le seigneur de Chasteau- Villain y voulloit boutter les feulx. Si se y tint, par l’espace de trois jours, pour garder ledict village; mais nul ne s’apparut pour che faire. Le duc manda le seigneur de Crequy, qu’il venist vers luy hastivement en la ville d’Espoisse, pour conclure à ses affaires, et pour aller devant Avallon, comme cy après sera dict.
