CHAPITRE CLXXIX

Comment les adversaires du duc de Bourgongne prinrent d'assault la ville de Mont-Sainct-Vincent ; et comment ils abandonnèrent le siège.

Le jour des rois audict an fut prinse des adversaires du duc la ville du Mont-Sainct-Vincent au pays de Charrollois, et fut prinse d’assault. C’est assavoir de Rodrigues Chappelle, Sallesart et pluiseurs aultres capitaines: et estoient en nombre de quatorze cents combattants. Le duc eult nouvelle de ladicte prinse le lendemain au vespre, en la ville de Dijon où il estoit; et tantost après icelles nouvelles ouies de ladicte prinse, assembla son conseil que dès icelle nuict il y envoyeroit de ses gens. Sy y envoya le bastard de Sainct-Pol et messire Baudast de Noyelle, le seigneur d’Auxy et aultres, atout cinq cents combattants; lesquels s’en allèrent logier à ung villaige à trois lieues près de ladicte ville de Mont-Saint-Vincent, et prinrent dix ou douze prisonniers desdicts adversaires, par quoy on sceult quels gens estoient en ladicte ville. Les chevaliers dessusdicts firent sçavoir au duc, quy pour lors estoit à Dijon, touttes nouvelles de sesdicts adversaires ; et lors se party le duc, ces nouvelles ouyes, en toutte haste pour les approchier, et s’en alla à Challons sur la Somme. Et quand le duc feut illec arrivé, il fist son mandement en sa duchié et comté de Bourgongne, et assembla grand nombre de gens, lesquels allèrent à Buschy, où les chevaliers dessusdicts nommés avoient esté dix à douze jours en gardant le pays du duc. Et allèrent adviser la ville du Mont-Saint- Vincent pour y mettre le siége, et quand ils eurent advisé la ville, ils se logièrent à demie lieue de la ville pour lendemain mettre le siége. Mais les dessusdicts adversaires, doubtants du siége qu’ils véoient approchier, se partirent et s’enfuirent par bois, haies et chemins, au

MEMOIRES DE SAINT-REMY

pays de Bourbonnois dont ils estoient partis, sans ce que les gens du duc s’en perchussent qu'il ne fut jour ; et quand les nouvelles vinrent en lost, les seigneurs en furent moult esbahis. Sy firent tantost mettre gens sus pour aller après, mais ils estoient sy eslongiés qu’il n’en y eult nuls prins. Aulcuns des gens entrèrent en la ville, laquelle estoit destruite desdicts adversaires, et les aultres s’en tirèrent à Challons. Tantost après se partist le duc de Challons pour aller à Chambery, en Savoie, aux nopces du comte de Genève, fils aisné du comte de Savoie et cousin germain du duc. Si furent en sa compaignie pluiseurs grands seigneurs des pays de Bourgongne et de Picardie, comme cyaprès sera dict.