CHAPITRE CLXXX
De la feste des nopces du comte de Genève, fils aisné du duc de Savoie, et de Anne, fille du roy de Cyppre, en la ville de Chambery; des princes, scigneurs, dames et damoiselles quy y furent; et de la pompe et esbattemens de ladicte feste.
Le dimanche, septiesme jour de fevrier, audict an mil quatre cent trente-trois, fut faicte la feste et solempnité des nopces de Loys, aisné fils du duc de Savoie, nommé comte de Genève, et de Anne, fille du roy de Cippre, en la ville de Chamberi en Savoie. Et à iceluy jour, entra ladicte dame des nopces en ladicte ville de Chamberi, environ quatre heures après midi, accompaigniée du cardinal de Cippre, oncle de ladicte dame, et deulx chevalliers nottables du royaulme de Cippre, et de pluiseurs aultres chevalliers, et escuyers, dames et damoiselles. Sy furent en la compaignie du comte de Genève seigneur des nopces, allencontre de ladicte dame, le duc et les ducs de Savoie et de Bar, Jehan monseigneur de Clèves, Jehan monseigneur de Nevers, Philippe monseigneur de Savoie, le prince d'Orange et le marquis de Salusse, le comte de Fribourg, Christophe de Harcourt, et pluiseurs grants seigneurs de Bourgongne, de Savoie et d’ailleurs, dont le recorder seroit trop long à escripre. Et quand les seigneurs dessusdicts furent issus de ladicte ville de Chambery, se partist le comte de Genêéve, seigneur des nopces, accompaignié de Jehan monseigneur de Clèves, Jehan mon-
seigneur de Nevers, Philippe monseigneur de
Savoie, son frère, et pluiseurs chevalliers et
escuyers, et allèrent au devant de ladicte dame plus avant que lesdicts aultres seigneurs dessusdicts ne firent, et trouvèrent ladicte dame une petite lieue de la ville. Or n'avoit oncques veu le comte de Genève, seigneur des nopees, ladicte dame; si la bienviengna et baisa, et aussi firent les dessusdicts de Clèves, de Nevers et de Savoie; et ce faict, retourna le comte de Genève vers les grans seigneurs dessusdicts, lesquels attendoient ladicte dame environ ung quart de lieue de la ville. Et les trois aultres, de Clèves, de Nevers et de Savoie, demourèrent avec ladicte dame et l'accompaignèrent jusques où les grants seigneurs estoient. Quand ladicte duchesse fust arrivée la où les grants seigneurs l’attendoient, hors de ladicte ville, elle fust receue grandement et honnourablement. Et là estoit le cardinal de Cippre à qui les honneurs furent faicts premiers ; et le baisa chascun des grants seigneurs à la joue, et puis après Jadicte dame des nopces; et ce faict, entrèrent dedans la ville en très grand et très noble compaignie. En icelle entrée estoit la dame vestue, et aussy les dames et damoiselles de sa compaignie, de la livrée du comte de Genève, seigneur des nopces ; laquelle livrée estoit robbes vermeilles, et dessus les manches ung estocq, enquel estocq pendoit une plame d’austrice faicte de brodure et d’orfaivrerie très gracieusement, et espousa en tel estat. À icelle entrée, et tout au long de la ville, fust la dame menée par deulx chevaliers à pied, nommés messire Jehan de Frise et messire Loys de la Morée, à destre du duc et du duc de Bar, et ainsi accompaigniée jusques à la chappelle du chastel, là où elle fust grandement receue. Devant la chappelle estoient pluiseurs grants dames et damoiselles, chevalliers et escuyers, qui la receurent grandement et honnourablement; et là estoient les dames : premièrement, madame Marguerite, fille au duc de Savoie, sœur au comte de Genève, seigneur des nopces et royne de Sézille, la dame de Gaucourt, la dame de Vauvert, la dame de Vergectes, la dame de Cutille et pluiseurs aultres dames et damoiselles, dont les noms seroient trop longs à escripre. Or fust la dame menée en la chappelle par le duc et le duc de Bar, et là où les solempnités de saincte Eglise furent faictes. Et ce faict, fust la dame menée en sa chambre pour lui ordonner, et là fust revestue d’une riche robbe
