CHAPITRE CLXXXV
ce grand avis et mesme délibéracion de conseil en grand nombre avec pluiseurs grands seigneurs de notre sang et lignaige et aultres nos feaulx et vassaulx, subjects et gens de. conseil en grand nombre, ayant pour nous et nos successeurs, féaulx, vassaulx et adhérants en ceste partie, fait et faisons bonne, léalle, ferme, seure et entière paix et réunion avec mondict seigneur le roy et ses successeurs, moyennant les offres et aultres choses cy-dessus escriptes, quy de la part de monseigneur le roy et ses successeurs nous doivent estre faictes et accomplies; et lesquelles offres, de nostre part et en tant qu'il nous touche, avons agréables et les acceptons. Et dès maintenant consentons et faisons les renonciations, promesses, submissions et aultres choses dessus déclairées, quy sont à faire de nostre part, et recongnoissons mondict seigneur, le roy Charles, nostre souverain seigneur, au regard des terres et seigneuries que avons en ce royaulme, promettant pour nous, nos hoirs et successeurs, par la foy et serment de nostre foy et corps, en parolle de prince, sur nostre honneur et obligation de tous nos biens présents et advenir quelconques, ladicte paix et réunion, et toutes et singulières choses cy-dessus transcriptes, tenir, garder, entretenir et accomplir de nostre part, et en tant que touchier nous peult, inviolablement et à tousjours de point en point, tant par la forme et manière dessus escriptes, sans faire ou venir, ou souffrir faire ou venir au contraire couvertement et en appert ne aultrement en quelque manière que ce soit; et pour les choses dessusdites et chascune d’icelles teair, entretenir et accomplir, nous submettons à la coercion, conclusion et constrainte de nostre sainct-père le pape, du sainct concille et desdicts cardinaulx, légats et aultres ambassadeurs du concille, et à touttes cours tant d’église comme séculiers, voulant et octroyant par icelles et chascun d’icelles estre constraints et complis par la censure de l’Église, tant et sy avant qu’il semblera expédient auxdicts cardinaulx et légats, ou cas que faulte auroit de ma part ès choses avant dites ou aulcunes d’icelles, renunchant à toutes allégations et exceptions, tant de droit que de faict, que pourrions dire ou allégier au contraire, et en espécial au droit, disant que générale renunciation ne vault, se l'espécial ne procède et tout sans fraulde, ba-
ras ou mal-engéin. Et afin que ve soit ferme chose et estable à tousjours, nous avons fait mectre notre scel, en nostre ville d'Arras, le vingt-unième jour de septembre, l’an de grasce 1435. »
