CHAPITRE CLXXX VIII
La coppie des lettres que le roy escripvit au duc de Bourgongne,
« Très chier et très amé cousin , pour ce que bien savons que très grant plaisir prenez à oyr nouvelles de nous et de nostre Estat, vous signifions que, grace à nostre Seigneur, nous sommes en très bonne santé et disposition de nostre personne, et que pareillement désirons estre et savoir de vous et de vostre estat, duquel, et de vos nouvelles, nous veuillez souvent rescripre et acertener; car d'en oyr en bien nous sera très grant resjouissement et plaisir ; et comme autrefois, vous avons resCript que par vos gens et ambassadeurs retournés devers vous, vous avez peu savoir comment nous avons esté très contents et très parfaitement joyeulx, quand par la révélation de beau-cousin de Bourbon, de Richemmont et de Vendosme, de nostre amé et féeal chancellier, de nostre cousin Christofle de Harcourt, et d’aultres, nos gens, qui ont esté à Arras, devers vous, avons esté acertenez plainement du bon et finable appoinctement pris et formé avecques vous, touchant la bonne amour, paix et union d’entre nous et vous, qui estoit la chose en ce monde que tousjours avons plus pourquise et désirée, espérant fermement que tout bien s’en ensieuvra à la gloire et louange de nostre Seigneur, et à la bonne prospérité de touttes nos affaires et les vostres, et mesme de toutte la chose publicque de nostre royaulme, et semblablement de touttes vos seigneuries. Et ad ce que tout le monde puist mieulx congnoistre et percevoir que de vray intérest avons accepté, voullons et désirons icelle paix inviolablement entretenir, et, en tant que polroit estre possible, augmenter et accroistre la proximité et affinité d’entre nous et vous de nostre propre mouvement, apprès ce qu'ila plu à nostre Créateur délivrer aujourd’hui nostire très chiere ettrès amée compagne, de ung beau fils à la santé d’elle et de l'enfant, vous avons, nonobstant vostre absence, esleu et nommé, par affection cordiale, pour estre nostre comptre, et pour donner vostre nom à nostredict fils, et le avons faict tenir de par vous, sur les saincts fonts de baptesme, par nostre
cousin de Bourbon, vostre frère, et par beaufrère, Charles d'Anjou; lesquels, en représentant vostre personne, lui ont donné vostre nom ; et pour la confiance que nous avons que doyez estre joyeulx de la nativité de nostredict fils, et de ce que, comme dict est, lui avons faict donner et porter vostredict nom, le vous rescripvons et faisons savoir par cestuy propre message, que pour ce envoyons devers vous, vous priant que, en ayant considération à vostre bonne intention, veuilliez avoir agréable ce que faict en avons, et réputer nostredict fils pour vostre filleul, comme se en propre personne le eussiez levé et tenu sur les saincts fonts; car Dieu scet qu’en toutte bonne amour et intention l’avons ainsi faict , et mesme pour tousjours mieulx accroistre et continuer amour entre nous et vous, nostre lignée et la vostre. En oultre, vous prions bien que la personne et bonne délivrance de nostre beau-frère, le roy de Sézille, dont autrefois vous avons bien espécialement escript, vueilliez, pour l'amour de nous, avoir en bonne mémoire et recommandation, et tellement que selon que nostre fiance y est, que briefs s’en doive percevoir de nostre intercession, car tout le plaisir bien et courtoisie que lui ferez, réputons à nous êstre faict semblablement. Et vous prions d’avoir la personne, estat et bon droict de nostre cousin, l’évesque de Tournay, pour singulièrement recommandé, et que soyez content de lui, et qu’il demeure paisible en son éveschié, selon ce que autrefois vous avons requis et rescript, sans lui donner sur ce aulcune vexation, et vous nous ferez très agréable plaisir. Ausurplus, de nos nouvelles qui, de par la grace de Dieu, sont depuis la-. dicte paix prospérées, et de jour en jour prospèrent de bien en mieulx, que désormais plus encore feront par vostre bon aide et moyen, vous en polrez estre en brief informés pleinement, par vos aultres gens qui encoires sont ici, et qui dedans briefs jours doibvent partir pour retourner par-devers vous. Pour che, de ceste heure plus avant ne vous rescripvons.
« Donné à Chinon, le quatriesme jour de février ; et ainsi signé, CHARLES.
« Et plus bas, Picquart. »
MEMOIRES DE SAINT-REM Y
