LIVRE 11, CHAP. IL

Clermont, lieutenant général èsdictes marches croiroit estre expédient, jusqu’à la saison d’esté ensuivant que le roy avoit intention d'y mectre plus grande provision. Mais ains que les gents du roy y fuissent arrivés, le seigneur de Tallebot, ses gents, et les barons du pays de Bourdelois meirent la pluspart dudict pays en lobéissance du roi d’Angleterre, et, par espécial, la ville et chastel de Chastillon en Perrigorre, laquelle estoit tenue par des gents du roy de France, et laquelle feut rendue auxdicts Anglois par faulte de secours; et s’en allèrent les Francois leurs corps et leurs biens saulfs. Et à toutes ces choses ne pooit résister le comte de Clermont, fils aisné du duc de Bourbon, jà-soit qu’il s’y gouvernast grandement et vailliamment; mais ains la venue de ceulx que le roy y envoya, il ne pooit résister à la puissance des Anglois, pour tant que la pluspart du pays de Bourdelois estoit du party du roy d'Angleterre.