CHAPITRE XVIIL

De la response que le duc feit aux ambassadeurs du roy, et cominent trefves feurent données trois jours.

Après ce que le due Philippes de Bourgoingne, comte de Flandres, olt oy la proposition faicte par les susdicts ambassadeurs du roy de France, de luy-mesme il leur respondit en telle manière : premier, en tant qu’ils avoient touchié que les Anglois, anciens ennemis du roy, se polroient boutter en la ville de Gand; que ce il ne craignoit point ; ne que pour homme quy feust vivant ne feroit paix auxdicts Gantois ses subjects, jusques à tant qu'ils se rendroient et mecteroient à faire sa vollonté, ou les mecteroit par force. Laquelle response oye par lesdicts ambassadeurs, ils n’osèrent plus parler contre la vollonté du duc; mais ils feirent tant qu’ils traictèrent de trefves trois jours tant seulement, que le duc octroya pour l'honneur du roy et non aultrement, quy feut depuis le vingthuictiesme jour de juing audict an cinquantedeulx, jusques au pénultiesme dudiet mois ; et avecques ce, à la requeste desdicts ambassadeurs, baillia saulf-conduict de certain nombre de Gantois pour venir, sy bon leur sembloit, devers ledict duc traictier de la paix.