La place de ce nom est en blanc dans les deux mss

plus part de leurs gens de traict avec une compaignie de gens à cheval, et assaillèrent les Anglois. Et là, y eult maintes flesches tirées tant d'un costé comme d'autre. Et pour reforchier les gens où la battaille s'estoit commencée, le régent y envoya une compaignie, sans ce que les batailles laissassent oncques leur ordonnance, ne François, ne Anglois. Et quant les François veirent que Anglois et Picars tindrent piet et vaillamment combattirent, ilz se retrayerent et oncques puis n'abordèrent ensemble, l'un contre l'autre, sy non par escarmuches. Et, comme je oy dire, celui de tous qui mieulx se monstra, ce jour, homme d'arme1, et qui plus y rompit de lances, ce fut Le Bastart de Saint-Pol. Messire Jehan de Croy y fut affolé d'un piet tellement que, toute sa vie, demoura affolé. Icelle journée se passa ainsi comme vous advez ouy, sans aultre chose faire ; et, quant ce vint envers soleil couchant, le roy se tira en la ville de Greppy, et les aultres se tirèrent es villages là entour.

Or, fault parler des Anglois. Vray est que aucuns veirent bien la retraicte des François. Sy les voloient aucuns poursuyr ; mais le régent ne le volt pas souffrir, pour le doubte des embusches ; car, comme ouy nombrer les François, ilz estoient bien de v à vj mille harnois de jambes. Quant les François furent ainsi partis, les Anglois logèrent en une abbaye là environ, et envoyèrent quérir des vivres à Senlis. Le lendemain, le roy et toutes sa puissance se mirent en belle ordonnance auprès de la ville de Grépy, avec eulx tous chariotz et bagaiges. Et, ces choses faictes, se mit aux