M. P. dit « le plus homme d'arme

champs et tourna le dos aux Anglois et s'en alla en la ville de Compeingne, laquelle, lors, tenoit le party des Anglois; mais, sans contredit nul, feirent ouverture au roy et le reçeurent à grant joye ; et là séjourna le roy cincq jours et y tint conseil de ce qu'il avoit affaire. Et quant le régent sceult que le roy estoit à Compiengne entré sans contredit, il se doubta fort que pluiseurs villes qui lors estoient en leur obéissance se tournassent du party du roy; pour laquelle cause, avec sa puissance, s'en retourna à Paris ; et là leissa Loys de Luxembourg, évesque de Thérouanne et chancellier de France pour les Anglois; le seigneur de Lille Adam, lors mareschal de France ; et aussi pluiseurs seigneurs d'Angleterre ausquelz il bailla en garde ladicte ville de Paris ; et s'en alla en Normendie pour pourvoir aux gardes des bonnes villes et forteresses. Quant le roy eult séjourné à Compiengne, comme dit est, il prinst son chemin avec toute sa puissance pour venir droit à Paris ; car la Pucelle lui avoit promis de le mectre dedans, et que de ce ne se debvoit point doubter. Touteffoiz, elle y failly, comme vous orez. Au partir de Compeingne le roy tira droit à Senlis, laquelle ville luy fîst obéissance; puisa Saint-Denis, et entra dedens. Et après fut ordené par les remonstrances que la Pucelle faisoit, que la ville de Paris seroit assaillie. Quant ce vint le jour de l'assault, la Pucelle, armée et habillée à tout son estandart, fut des premiers assaillans, et alla si près quelle fut navrée du traict ; mais les Anglois deffendirent si bien la ville ([ue les François ne peurent riens faire et se retrayerent en la ville de Saint-Denis. Après que le roy eult esté en la ville de Saint-Denis pluiseurs jours, véant que la

ville de Paris estoit trop forte gardée, se retira oultre la rivière de Saine et donna congié à la plus part de ses gens, lesquelz se mirent en garnison en pluiseurs villes, tant à Beauvais, Senlis, Compiengne, Soissons, Creppy, et en pluiseurs aultres villes de ça Saine, du costé de Picardie; lesquelz fyrent forte guerre tant sur les Anglois que sur les gens du duc. Et, ainsi se passa icelle année, comme vous avez ouy, avec pluiseurs aultres choses qui trop longues seroient à raconter.